මහින්ද නාමල් ලියු සලාම්-ෂලෝම් ග්රන්ථය එළි දකී.
Salam හා Shalom ග්රන්ථය ශ්රී ලංකාවේ ක්රිස්තියානි-ඉස්ලාම් සංවාදයේ ඓතිහාසික පියවරකි. චතාරිකයත්-රාමසාන් උපවාසයත් එකට යෙදීමට අරුතක් එක් කිරීමකි.
කිතුනු නොවන ආගම් සමඟ සංවාදය නිල වශයෙන් පිළිගත් 2 වන වතිකාන කතිකාවේ 16 වන ප්රකාශනය වු In our Time (Nostra Aetate) ප්රකාශනයට පසුගිය ඔක්තෝබරයේ වසර 60 ක් පිරිමත්, කිතුනු-ඉස්ලාම් සංවාදයට විශාල ආලෝකයක් සැපයු අසීසියේ ප්රැන්සිස් තුමන්ගේ ජුබිලි වර්ෂය 2026 ට යෙදීමත්, මාර්තු 15 වනදාට යෙදෙන එක්සත් ජාතීන්ගේ සංවිධානය ප්රකාශයට පත් කළ ඉස්ලාම් ෆෝබියාවට එරෙහිව සටන් කිරිමේ ජාත්යන්තර දිනයක් නිමිති කරගෙන මහින්ද නාමල් ලියු ඉස්ලාම්-කිතුනු සංවාදය දිරිගන්වන සලාම්-ෂලෝම් කෘතිය මාර්තු 08 ඉරිදා කළුතර මුස්ලිම් මධ්ය මහා විද්යාලයේදී ඉස්ලාම් හා කිතුනු ප්රජාවන්ට අයත් පිරිසකගේ සහභාගීත්වයෙන් දොරට වඩින ලදී.
මේ, 2026 වර්ෂයේ කිතුනුවන්ගේ චතාරික සමයත්, ඉස්ලාම් භක්තිකයින්ගේ රාමසාන් උපවාස සමයත් එකට යෙදී තිබෙනවා. මෙම ප්රජාවන් දෙකම තම ධර්මයන් විසින් උගන්වන විමුක්තිදායක සත්යයන් ගැඹුරින් මෙනෙහි කරන කාලයක්. ඉතිං මේ කාලය Salam හා Shalom ග්රන්ථය අප සියල්ලන්ට ඉතා අරුත්බර මෙනෙහි කිරිමට අත්වැලක් සපයනවා යැයි ග්රන්ථයේ දොරට වැඩිමේදි උත්සවය අමතා ගරු ශෙරාඩ් ජයවර්ධන පියතුමා පැවැසීය. උන්වහන්සේ තව දුරටත් පැවසුවේය.
‘අද මේ පොත දොරට වඩින මොහොත තුළ ධනලෝභි බලලෝභී අරමුණුවලට ආගමික අර්ථ කථන ලබාදෙන ඛේදජනක යුද්ධයක් අහිංසක මිනිසුන්ගේ ජීවිත වනසමින් ක්රියාත්මක කරනවා. ඒ අනුව අපගේ ධර්මයන් එහි හරයට පිටුපා යුද්ධයට අවභාවිත කිරිම වැලැක්වීමට නම් ධර්මයේ නියම හරය සොයා යා යුතු බවයි. ධර්මයේ විමුක්ති හරය තුළ ජනතාව වශයෙන් අප එක් වී සිටින්නේ නම් බලවතුන්ට, දේශපාලකයින්ට අපව ඔවුන්ගේ අරමුණු වෙනුවෙන් භාවිත කිරිමට ඉඩක් නොලැබේ. ඒ සඳහා මෙවැනි උත්සහයන් ඉතා වැදගත් බවයි.’
ඉස්ලාම් පාර්ශවයෙන් ග්රන්ථය ගැන ප්රධාන අදහස් දැක්වීම සිදු කළ, ප්රධාන දෙසුම ශ්රී ලංකාවේ විශ්ව විද්යාලයකින් ශාස්ත්රපති උපාධියක් සිංහල හා පාලි භාෂාව වෙනුවෙන් ලබාගත් ප්රථම මුස්ලිම් ජාතිකයා වු Ash sheikh-Nasik Farook මව්ලවි තුමන් මෙසේ පැවසුවේය.
‘ලෝකයේත්, ලංකාවේත් ආගමික ගැටුම් නිමා කිරීම සඳහා අප යා යුත්තේ අන්තවාදයට සෙට නොව සංවාදය දෙසටයි. මේ පොත අපිට පෙන්වා දෙන සත්යය එයයි. මේ පොතේ කතුවරයා අපට ආරාධනා කරන්නේ විවිධත්වය තුළ ඒකත්වය කරා යාමටත් පමණක් නොවේ විවිධත්වය තුළ ඇති විචිත්රත්වය අත්විඳීමටයි, සැමරීමටයි.
ක්රිස්තියානින් හා ඉස්ලාම්කයින් පමණක් නොව මුළු ලොව එක පියෙකුගේ දරුවන් බව බයිබලය හා කුරානය ඇසුරින් පෙන්වා දෙන කතුවරයා අපි ඉතා සමීප ඥාති බව ගැඹුරින් ඒත්තු ගන්වයි. මේ පොත කියවා අවසානයේදී අපිට මේ තරම් සමීප නැදෑයින් මෙසේ බෙදි ගැටුම් ඇති කර ගැනීමේ හේතුව කුමක්දැයි හඳුනා ගැනීමට නිතැතින්ම පෙළඹීමක් ඇති කරනවා.
සාමාන්යයෙන් පවතින ජනප්රිය අදහසක් තමයි දේශපාලකයින් අපව ඔවුන්ගේ අරමුණු සඳහා වෙන් කරනවා යන්න. නමුත් අපි තේරුම් ගන්න අවශ්යයි දේශපාලකයින් එසේ කිරිමට හැකි වන්නේ අප තුළම සිටින තම හතුරෙක් නිසා බව. ඒ අප තුළ සිටින සතුරා තමයි අනවබෝධය. අප සමඟ ජීවත්වන සහෝදර සහෝදරියන්ගේ ආගම, සංස්කෘතිය, සිරිත් විරිත් ගැන අපේ ඇති අනවබෝධය, සලාම්-ෂලෝම් ග්රන්ථය සපයනවා. අපි සතුරන් නොව මිතුරන් විය යුතු බව අවධාරණය කරනවා.
ජාත්යන්තර කාන්තා දිනය යෙදි තිබු මාර්තු 08 වනදා පැවැති මෙම දොරට වැඩීමේ උත්සවය ආරම්භ වූයේ ජේසුස් වහන්සේ හා නබි තුමන් එදා පැවැති සමාජ ආකල්ප අභිබවා යමින් ස්ත්රීය කෙරෙහි දැක්වූ ධාර්මික ආලෝකය සිහිපත් කරමින් ශුද්ධ වු පවුලේ පැවිදි නිකායේ ගරු චරිතා තන්ඩෙල්ගේ පැවිදි සොයුරිය හා ගරු අල් ආලිමා නුස්කා සදූර්දීන් මව්ලවි තුමිය විසින් ශුද්ධ වූ බයිබලය සහ ශුද්ධ වූ කුරානයේ සමාන පාඨ දෙකක් කියවීමෙනි. කායින් හා අබෙල් පිළිබඳ සිදුවීම පදනම් කරගත් එම පාඨ ඇසුරින් අපි එකිනෙකා අනෙකාගේ රැකවලුන් විය යුතු බව මෙනෙහි කරන ලදි. ඉන් පසු මැද පෙරදිග මේ මොහොතේ පවතින යුද්ධයෙන් මිය යන අහිංසක ජනතාව සිහිපත් කරමින් නිහඬ කාලයක් ගත කරන ලදි.
සලාම් හා ෂලෝම් ග්රන්ථයට පසුවදනක් සපයන වතිකානයේ අන්තර් ආගමික සංවාදය පිළිබඳ සංසදයේ සාමාජික, ශ්රී ලංකා රදගුරු මණ්ඩලයේ අන්තර් ආගමික කටයුතු පිළිබඳ කොමිසමේ සභාපති බදුල්ල පදවියේ රදගරු ජූඩ් නිශාන්ත සිල්වා රදගුරු හිමිපාණන් මෙසේ සඳහන් කර ඇත.
‘තම තමන් අදහන ආගම තුළ ඇදහිල්ලේ දිවි පෙවතක් ගත කරමින් අනෙකුත් ආගමික සහෝදරයාව ද ප්රේමයෙන් පිළිගැනීම සියලුම ආගම්වල ඉගැන්වීම වේ ‘සලාම් - ෂලෝම්’ පොතෙහි කතුවරයා ද මෙම පණිවිඩය ප්රමුඛත්වෙහි ලා සළකමින් කිතුනු දහම හා ඉස්ලාම් දහම තුළ පවතින්නාවු සමානතා ඉදිරිපත් කරමින් අපව දිරිගන්වන්නේ විවිධ මතවාදයන් පසෙකලා සංවාදය තුළ අප සියලු දෙනා එක්විය යුතු බවයි. එය වර්තමාන ලෝකයට කරන වටිනා ඇරයුමක්. මෙම පොත ලිවීමෙන් ඔහුගේ අරමුණ ඉටුවී ඇති බව මාගේ හැඟීමයි.’
පොත දොරට වැඩීමේ උත්සවයේ අවසානයේදී කිතුනු පූජකතුමන්ලා, පැවිදි සොයුරියන් හා ඉස්ලාම් මව්ලවි තුමන්ලා හා මව්ලවි තුමියන් ඇතුළු ඉස්ලාම් කිතුනු ගිහි ජනතාව එකට එක් වී උපවාසය අවසන් කරන ඉෆ්තාර් පිළිවෙතට ද සහභාගී විය.
ක්රිස්තු වර්ෂ 1219 දී ඊජිප්තුවේ අල් කමල් සුල්තාන්වරයා හා අසීසියේ ප්රැන්සිස් තුමන් කුරුස යුද්ධ අතර තුර ජීවිත අවදානම පසෙකලා සිදු කළ සංවාදය අලලා නිපැයු The Sultan and Saint චිත්රපටය ප්රදර්ශනය කෙරුණු අතර එම සංවාදය අගය කරනු වස් පොත පිළිගැන්වීම ශ්රී ලංකාවේ ප්රැන්සිස්කානු පූජකවරුන්ගේ කෙනෙකු වූ ගරු ඩොනල්ඩ් පියතුමාට කතුවරයා විසින් සිදු කරන ලදි. එසේ ම පොත ප්රකාශයට පත් කළ කිතුසර කණ්ඩායම වෙනුවෙන් ගරු ටෙරන්ස් ප්රනාන්දු පියතුමා නාසික් ෆාරුක් මව්ලවි තුමාටද, ගරු එම් සත්යවේල් පියතුමා ගරු මොරිස් නාමල් පියතුමාට ද පොත පිළිගන්වන ලදී. ඊට අමතරව කතුවරයාගේ උගත් පාසල්හී අකුරු කළ මුස්ලිම් සහෝදරත්වය වෙනුවෙන් අස්ලි සිද්දික් සොහොයුරාටද, කතුවරයාගේ ඉගැන්වූ පාසලේ ඉස්ලාම් සිසුවියන් විසින් ෆාතිමා ෆෙරෝස් සොයුරියට පිළිගන්වන ලදී.
