මත්ද්රව්ය ඇබ්බැහියෙන් බිඳුණු ජීවිත යළි ගොඩනගන කිතුනු සභා මෙහෙවර
ආසියානු රදගුරු සමුළු සම්මේලනයේ (FABC) 12 වැනි මහා සමුළුව ඉන්දුනීසියාවේ ජකර්තා නුවරදී "සංගමනශීලී පරිවර්තනය සහ ආසියාවේ පාලම් හා පාලම් තනන්නන් වීමේ මෙහෙවර" යන තේමාව යටතේ පැවැත්වීමට සූදානම් වන මෙම අවස්ථාවේ, ශ්රී ලංකාවේ චවනොඩ් කුරුස කන්යා සොහොයුරියන්ගේ බන්ධනාගාර දේව සේවාව පාලම් තැනීමේ ප්රායෝගික සාක්ෂියක් ලෙස කැපී පෙනෙයි.
රට තුළ ශීඝ්රයෙන් වර්ධනය වන මත්ද්රව්ය ඇබ්බැහි වීමේ අර්බුදය හමුවේ, කන්යාසොහොයුරියන් දයානුකම්පාව, ආධ්යාත්මික රැකවරණය සහ පුනරුත්ථාපන සේවාව තුළින් සිරකරුවන් සමඟ ගමන් කරමින්, බිඳුණු සබඳතා යළි ගොඩනඟා, මිනිස් ගෞරවය තහවුරු කරමින්, ඔවුන් පවුල, සමාජය සහ දෙවියන් වහන්සේ සමඟ යළි සම්බන්ධ කිරීමට කැපවී සිටිති.
චවනොඩ් කුරුස කන්යා සොහොයුරියන්ගේ ප්රාදේශාධිපතිනි ගරු මොරීන් පීරිස් කන්යාසොයුරිය පවසන්නේ සැබෑ පාලම් තැනීම ආරම්භ වන්නේ අන් අයට සවන් දීමෙන් බවයි.
මහනුවර දුම්බර බන්ධනාගාරයේ සේවය කරන ඇය පෙන්වා දෙන්නේ මෙම දේව සේවාව හරහා මත්ද්රව්ය සම්බන්ධ වැරදිවලට සිරගත වූ කාන්තාවන් බොහෝ දෙනෙකු හමුවන බවයි. ඔවුන්ගෙන් බොහෝ දෙනෙක් යහපත් පවුල් පසුබිමකින් පැමිණි අය වන අතර, ඇතැමුන් ප්රසිද්ධ කතෝලික පාසල්වල අධ්යාපනය ලැබූ අයද වෙති. එමඟින් මත්ද්රව්ය ඇබ්බැහි වීම සමාජ, ආර්ථික හෝ ආගමික සීමාවන් නොහඳුනන ගැටලුවක් බව පැහැදිලි වේ.
සෑම සතියකම කන්යාසොහොයුරියන් ධර්මෝපදේශ පන්ති පවත්වමින්, සිරකරුවන් සමඟ යාච්ඤා කරමින් සහ ඔවුන්ගේ ජීවිත කතා සාවධානයෙන් අසමින් කාලය ගත කරති.
"මෙම හමුවීම් පාලම් තැනීමේ ශුද්ධ වූ අවස්ථාවන් බවට පත්ව තිබෙනවා," යැයි ගරු මොරීන් පීරිස් කන්යාසොයුරිය පැවසුවාය.
ඇය පවසන පරිදි බොහෝ කාන්තාවන් බිඳුණු පවුල් සබඳතා, මානසික වේදනා, පවුල් ගැටුම්, තනිකම, නරක ඇසුර සහ වැරදි තීරණ හේතුවෙන් මත්ද්රව්යවලට ඇබ්බැහි වූ ආකාරය විස්තර කරති. එම සෑම කතාවක්ම තුළ පිළිගැනීම, අවබෝධය සහ ආදරය ලැබීමේ ගැඹුරු ආශාවක් සැඟවී ඇත.
ගරු මොරීන් පීරිස් කන්යාසොයුරියගේ අත්දැකීම අනුව සැබෑ සුවය ආරම්භ වන්නේ පුද්ගලයෙකුට අවංකව සවන් දෙන කෙනෙකු හමුවූ විටය.
යාච්ඤාව, ශුද්ධ ලියවිල්ල මෙනෙහි කිරීම, ධර්මෝපදේශ සහ පෞද්ගලික සහාය තුළින් බොහෝ සිරකරුවන් තමන්ගේ අනන්යතාව තීරණය කරන්නේ මත්ද්රව්ය හෝ අතීත වැරදි නොව, දෙවියන් වහන්සේගේ දරුවන් ලෙස තමන් සතු ගෞරවය බව යළි සොයා ගනිති.
මෙම සේවාව බන්ධනාගාරය තුළට පමණක් සීමා නොවේ. කන්යාසොහොයුරියන් සිරකරුවන්ගේ පවුල් වෙත ගොස් සමගිය දිරිගන්වන අතර, හැකි සෑම අවස්ථාවකම ඔවුන්ගේ දරුවන්ගේ අධ්යාපනයටද සහාය වෙති. එමඟින් මව සහ දරුවන්, දියණියන් සහ දෙමාපියන් මෙන්ම හිටපු සිරකරුවන් සහ සමාජය අතර බිඳුණු සබඳතා යළි සවිමත් කිරීමට උත්සාහ කරති.
එහෙත් සිරෙන් නිදහස් වූ පසුද අභියෝග අවසන් නොවේ. බොහෝ දෙනෙක් නැවතත් තමන් මත්ද්රව්යවලට ඇබ්බැහි වූ පරිසරයටම ආපසු යති. පවුලේ ප්රතික්ෂේප කිරීම, රැකියා අවස්ථා නොමැතිකම සහ සමාජ අපකීර්තිය නිසා ඔවුන්ගේ නැවත සමාජගත වීම ඉතා දුෂ්කර වේ.
"සුවය ලැබීම පුද්ගලයාගේ අධිෂ්ඨානය මත පමණක් රඳා පවතින්න බැහැ. සුවය කරා යන ගමනේදී ඔවුන් සමඟ ගමන් කිරීමට සූදානම් ප්රජාවක් අවශ්යයි," යැයි ගරු මොරීන් පීරිස් කන්යාසොයුරිය පැවසුවාය.
ඇය පෙන්වා දෙන්නේ මෙම සේවාව සංගමනශීලී සභාවේ ආත්මය පිළිබිඹු කරන බවයි. එනම් සවන් දීම, සහභාගිත්වය, සහායකත්වය සහ එකමුතුකම තුළින් එකට ගමන් කිරීමයි. බන්ධනාගාර දේව සේවාව යනු සිරකරුවන් බැලීමට යාම පමණක් නොව, බොහෝවිට අමතක කරනු ලබන මිනිසුන් සමඟ ගමන් කරමින් ඔවුන්ට බලාපොරොත්තුව යළි සොයා ගැනීමට උපකාර කිරීම බව ඇය සඳහන් කළාය.
මෙම සේවයට සහාය දක්වන්නේ මහනුවර රදගුරු පදවියේ බන්ධනාගාර දේව සේවක ලෙස වැලන්ස් මෙන්ඩිස් හිමිපාණන් විසින් පත්කර ඇති ගරු ජෝන් ස්ටීවන් පියතුමා ය.
ගරු ජෝන් ස්ටීවන් පියතුමා පවසන්නේ බොහෝ සිරකරුවන් ගැඹුරු මානසික වේදනාවන් රැගෙන සිටියද, ඔවුන් දෙවියන් වහන්සේගේ වචනයට විවෘත හදවතක් ඇති බවයි.
යාච්ඤාව, සක්රමේන්තු සහ නිරන්තර දේව සේවය තුළින් බොහෝ සිරකරුවන් සැබෑ පරිවර්තනයක් අත්විඳින බවත්, සමාව ඉල්ලා සිටිමින්, අභ්යන්තර සුවය සොයමින්, නව ජීවිතයකට හැරෙන බවත් ඔහු සඳහන් කළේය.
"දෙවියන් වහන්සේගේ දයාවෙන් බැහැරව සිටින කිසිවෙකු නැහැ," යැයි ගරු ජෝන් ස්ටීවන් පියතුමා පැවසීය.
ඔහුට අනුව බන්ධනාගාර දේව සේවාව යනු බලාපොරොත්තුව යළි ලබාදීම, මිනිස් ගෞරවය තහවුරු කිරීම සහ සමාජයට නව අරමුණක් සමඟ නැවත පිවිසීමට සිරකරුවන් සූදානම් කිරීමේ මෙහෙවරකි.
ගරු මොරීන් පීරිස් කන්යාසොයුරිය පෙන්වා දෙන්නේ මත්ද්රව්ය ඇබ්බැහි වීමේ අර්බුදයට එක් ආයතනයකට පමණක් මුහුණ දිය නොහැකි බවයි. ඒ සඳහා රජයේ ආයතන, පාසල්, පවුල්, ආගමික ප්රජාවන් සහ සිවිල් සමාජය එක්ව වැළැක්වීම, පුනරුත්ථාපනය සහ නැවත සමාජගත කිරීම සඳහා ශක්තිමත් සහයෝගිතාවක් ගොඩනැගිය යුතු බව ඇය අවධාරණය කළාය.
බන්ධනාගාර දේව සේවාව, පෞද්ගලික සහායකත්වය, පවුල්වලට උපකාර කිරීම සහ සුවය ලබන පුද්ගලයන් ආදරයෙන් පිළිගන්නා පල්ලි ප්රජාවන් තුළින් සභාවට ඉටු කළ හැකි කාර්යභාරයද ඇය විශේෂයෙන් අවධාරණය කළාය.
ආසියානු රදගුරු සමුළු සම්මේලනයේ රදගුරුවරුන් "පාලම් හා පාලම් තනන්නන්" වීම පිළිබඳ මෙනෙහි කිරීමට සූදානම් වන මේ මොහොතේ, දුම්බර බන්ධනාගාරයේ මෙම දේව සේවාව එම මෙහෙවරේ ප්රායෝගික ආදර්ශයක් බව ගරු මොරීන් පීරිස් කන්යාසොයුරිය පවසයි.
"සෑම සංවාදයක්ම, සෑම යාච්ඤාවක්ම, සෑම සහායකත්වයක්ම සහ යළි සවිමත් වන සෑම සබඳතාවයක්ම මත්ද්රව්ය ඇබ්බැහියෙන් සුවය කරාත්, ප්රතික්ෂේප කිරීමෙන් පිළිගැනීම කරාත්, බලාපොරොත්තු රහිතභාවයෙන් බලාපොරොත්තුව කරාත් තැනෙන පාලමක් බවට පත්වෙනවා," යැයි ඇය පැවසුවාය.
ඇයගේ අත්දැකීම අනුව සැබෑ පාලම් තැනීම ආරම්භ වන්නේ දැවැන්ත ව්යාපෘතිවලින් නොව, සුවය, සමගිය සහ නව ජීවිතය කරා තවත් පුද්ගලයෙකු සමඟ ගමන් කිරීමට ඇති කැමැත්තෙනි.
#FABC2026 #FABC #Jakarta2026 #SriLanka #ChurchInAsia #BridgeBuilders #SynodalConversion #InterreligiousDialogue #CatholicChurch #RVASinhala #RadioVeritasAsia #CatholicNews
