බලාපොරොත්තුවෙන් එක්ව ගමන් කිරීමෙන්ම සංගමනශීලීත්වය ඇරඹේ. - කිකුචි කාදිනල් හිමිපාණන්

බලාපොරොත්තුවෙන් එක්ව ගමන් කිරීමෙන්ම සංගමනශීලීත්වය ඇරඹේ. - කිකුචි කාදිනල් හිමිපාණන්

සංගමනශීලීත්වය යනු න්‍යායාත්මක අදහසක් හෝ සභා වැඩසටහනක් නොව, එකිනෙකා රැකබලා ගන්නා ප්‍රජාවන් තුළ මුල් බැසගත් ජීවන රටාවක් බව ආසියානු රදගුරු සමුළු සම්මේලනයේ (FABC) මහලේකම් සහ ටෝකියෝ අගරදගුරු ටාර්සිසියෝ ඉසාඔ කිකුචි කාදිනල් හිමිපාණන් ජූලි 20 වැනිදා FABC 12 වැනි මහා සමුළුවේ සහභාගිවන්නන් අමතමින් ප්‍රකාශ කළහ.

ජූලි 20 සිට 26 දක්වා ජකර්තාවේ පැවැත්වෙන "සංගමනශීලී පරිවර්තනයට කැඳවීම සහ ආසියාවේ පාලම් තැනීමේ හා පාලම් තනන්නන් වීමේ මෙහෙවර" යන තේමාව යටතේ පැවැත්වෙන ආසියානු රදගුරු සමුළු සම්මේලනයේ 12 වැනි මහා සමුළුවේ සමාරම්භක දිනය අවසන් කරමින් පැවති දිව්‍ය පූජාවට ප්‍රධානත්වය ගනු ලැබුවේ කිකුචි කාදිනල් හිමිපාණන් විසිනි.

ඉන්දුනීසියාවේ ෆ්ලොරස් දූපතේ එන්දේ ප්‍රදේශයේ පිහිටි කුඩා ගම්මානයකට කළ මෑත සංචාරයක් සිහිපත් කළ කිකුචි කාදිනල් හිමිපාණන්, සභාවේ සංගමනශීලී ගමන කෙබඳු විය යුතුද යන්න පිළිබඳ ජීවමාන සාක්ෂියක් එහිදී තමන් දුටු බව පැවසූහ.

"බලාපොරොත්තුව යනු අපට මිලදී ගත හැකි හෝ වෙනත් කෙනෙකුට ලබා දිය හැකි දෙයක් නොවේ. එකිනෙකා ගැන සැබෑ ලෙස සැලකිලිමත් වන මිනිසුන් හමු වන විට බලාපොරොත්තුව උපදියි," යැයි දේව මෙහෙයේදී එතුමා ප්‍රකාශ කළහ.

කාබනික ගොවිතැන් ව්‍යාපෘතියක් නැරඹූ අවස්ථාවේදී, සීමිත සම්පත් තිබියදීත් ප්‍රීතියෙන්, ගෞරවයෙන් සහ අන්‍යෝන්‍ය සහයෝගයෙන් ජීවත් වන ගම්වැසියන් තමන් දුටු බව කිකුචි කාදිනල් හිමිපාණන් සිහිපත් කළහ. Caritas Internationalis හි සභාපතිවරයා ලෙස ලොව පුරා මානුෂීය සහ සංවර්ධන ව්‍යාපෘති රැසක් නැරඹූ නමුත්, එන්දේ ප්‍රජාවේ සරල ජීවිතය තමන්ගේ සිතෙහි නොමැකෙන සටහනක් තැබූ බවද එතුමා සඳහන් කළහ.

"මට නම්, සංගමනශීලීත්වය එහි සැබෑ ස්වරූපයෙන් දිස්වන්නේ මෙලෙසයි. එය හුදෙක් සංකල්පයක් නොව, එකට ගමන් කරන, එකිනෙකාට සහය දෙන සහ බලාපොරොත්තුව පෝෂණය කරන ප්‍රජාවක ජීවිතයයි," යැයි එතුමා පැවසූහ.

මෙම අත්දැකීමෙන් තමන්ට නැවතත් සිහිපත් වූයේ සභාවේ මෙහෙවර ආයතන හෝ බහුල සම්පත් මත නොව, එකිනෙකා සමඟ ගමන් කිරීමටත්, අවශ්‍යතා ඇති අයට සේවය කිරීමටත් කැමති ප්‍රජාවන් තුළින් ආරම්භ වන බව බවද කිකුචි කාදිනල් හිමිපාණන් ප්‍රකාශ කළහ.

ප්‍රාදේශීය වේලාවෙන් පස්වරු 6.00ට ආරම්භ වූ මෙම දිව්‍ය පූජාවේ ප්‍රධාන පූජකයා වූයේ කිකුචි කාදිනල් හිමිපාණන් වන අතර, තායිලන්තයේ බැංකොක් අගරදගුරු ෆ්‍රැන්සිස් සේවියර් වීරා හිමිපාණන් සහ ටිමෝර්-ලෙස්තේහි බෝකාඋ රදගුරු ලියැන්ඩ්‍රෝ මරියා අල්වෙස් හිමිපාණන් සහ පූජාව සමරනු ලැබූහ.

කාදිනල්වරුන්, රදගුරුවරුන්, පූජකවරුන්, කන්‍යාසොයුරියන්, ගිහි නියෝජිතයන්, සංවිධායකයන් සහ ආසියාව පුරා සිටි ආරාධිතයන් ඇතුළුව 200කට ආසන්න පිරිසක් මෙම දිව්‍ය පූජාවට සහභාගී වූහ. ජකර්තා අගරදගුරු ඉග්නේෂස් සුහාරියෝ කාදිනල් හිමිපාණන් සහ ඉන්දුනීසියානු කතෝලික රදගුරු සමුළුවේ සභාපති ඇන්ටෝනියස් සුබියාන්ටෝ බුන්ජමින් හිමිපාණන් ද එහි සිටියහ.

සමුළුවේ තේමාව පිළිබඳ මෙනෙහි කරමින් කිකුචි කාදිනල් හිමිපාණන් සහභාගිවන්නන්ගෙන් ඉල්ලා සිටියේ යාච්ඤාව, විමර්ශනය සහ සංවාදයෙන් පිරුණු මෙම දින, ආසියාව පුරා ප්‍රාදේශීය සභාවන් තුළ කල්පවත්නා අලුත් වීමකට මඟ පෙන්විය යුතු බවයි.

"අපට එකවර මුළු ලෝකයම වෙනස් කළ නොහැකියි. අපි ආරම්භ කරන්නේ මූලික ප්‍රජාවන්ගෙන්, එකිනෙකාට උපකාර කරන මිනිසුන්ගෙන්. බලාපොරොත්තුව වැඩෙන්නේ එතැනයි. සංගමනශීලීත්වය පිළිබඳ සභාවේ සාක්ෂිය ප්‍රකාශ වන්නේද එතැනයි," යැයි එතුමා පැවසූහ.

සංස්කෘතික, ආගමික සහ සමාජීය විවිධත්වයෙන් පිරුණු සමාජයන් තුළ සහභාගිත්වය, සහභාගී වීම සහ මෙහෙවර ශක්තිමත් කරමින් පාලම් තනන්නෙකු වීමට ආසියාවේ සභාව කැඳවන සමුළුවේ පණිවිඩය, කිකුචි කාදිනල් හිමිපාණන්ගේ මෙම දේශනය තවදුරටත් තහවුරු කළේය.

කර්තෘ පිළිබඳව
අමඩේයා ප්‍රනාස්තිති සමාජ සන්නිවේදන ක්ෂේත්‍රයේ ක්‍රියාකාරිනියක් වන අතර, දැනට ඉන්දුනීසියානු කතෝලික රදගුරු සමුළුවේ ලේඛන හා තොරතුරු අංශයේ ස්වාධීන දායකයෙකු ලෙස කටයුතු කරයි.

#XIIFABCPlenary #FABC2026 #FABC #FederationOfAsianBishopsConferences #CardinalTarcisioIsaoKikuchi #Synodality #BridgeBuilders #ChurchInAsia #Jakarta2026 #CatholicChurch #RadioVeritasAsia #RVASinhala