"කාන්තාවන්ට ඔවුන්ට හිමි නිසි ස්ථානය ලබාදෙන්න" – ආසියානු රදගුරුවරුන්ට ඉන්දීය ජේසු නිකායික පියතුමකුගේ ආයාචනය

"කාන්තාවන්ට ඔවුන්ට හිමි නිසි ස්ථානය ලබාදෙන්න" – ආසියානු රදගුරුවරුන්ට ඉන්දීය ජේසු නිකායික පියතුමකුගේ ආයාචනය

ආසියානු රදගුරු සමුළු සම්මේලනයේ (FABC) 12 වැනි මහා සමුළුව සඳහා ජූලි 20 සිට 26 දක්වා ඉන්දුනීසියාවේ ජකර්තා නුවරට ආසියාවේ කතෝලික රදගුරුවරුන් එක්රැස් වන අතර, සභාව සංගමනශීලීත්වය කරා සැබෑ ලෙස පරිවර්තනය වීමට නම් කාන්තාවන් සවිබල ගැන්වීම එහි මූලික ප්‍රමුඛතාවක් විය යුතු බව ඉන්දීය ජේසු නිකායික ගරු සෙඩ්රික් ප්‍රකාශ් පියතුමා අවධාරණය කරයි.

රේඩියෝ වෙරිටාස් ආසියා (RVA) සමඟ මහා සමුළුවට පෙර පැවති සාකච්ඡාවකදී ගරු සෙඩ්රික් ප්‍රකාශ් පියතුමා පැවසුවේ, ආසියාවේ සභාව සංගමනශීලී සහ ධර්මදූතීය සභාවක් වීමට සැබෑ කැපවීමක් දක්වන්නේ නම්, පළමුව තමන් පිළිබඳ ගැඹුරු ආත්ම පරීක්ෂාවකට ලක්විය යුතු බවයි.

බටහිර ඉන්දියාවේ ගුජරාට් පළාතට අයත් ජේසු නිකායික පූජකවරයකු වන ගරු සෙඩ්රික් ප්‍රකාශ් පියතුමා, ජාත්‍යන්තර වශයෙන් ප්‍රකට මානව හිමිකම්, සංහිඳියාව සහ සාමය වෙනුවෙන් ක්‍රියාකරන ක්‍රියාධරයෙකු, ලේඛකයෙකු සහ දේශකයෙකි.

2021 ඔක්තෝබර් මාසයේදී ෆ්‍රැන්සිස් ශුද්ධෝත්තම පියතුමා විසින් සංගමනශීලී ගමන ආරම්භ කළ දා සිට, ඉන්දියාවේ සංගමනශීලීත්වය පිළිබඳ අවබෝධය ප්‍රවර්ධනය කිරීමේ සහ ගැඹුරු කිරීමේ කාර්යයේ ඉදිරියෙන්ම සිටි අයෙකි. ඔහු මෙම විෂය සම්බන්ධයෙන් ලොව පුරා ප්‍රමුඛ කතෝලික සඟරා සහ අන්තර්ජාල මාධ්‍යවල ලිපි රැසක් පළ කර ඇති අතර, සංගමනශීලීත්වය පිළිබඳ සම්මන්ත්‍රණ, සම්මන්ත්‍රණ මාලා, වෙබ් සම්මන්ත්‍රණ සහ ආධ්‍යාත්මික පුනරුත්ථාපන වැඩසටහන් රැසකට නායකත්වය දී ඇත.

ආසියානු රදගුරු සමුළු සම්මේලනයේ මෙම මහා සමුළුව සඳහා ඔහු යෝජනා කරන ප්‍රමුඛතාවන් අතරින් වැදගත්ම කරුණක් වන්නේ "කාන්තාවන්ට ඔවුන්ට හිමි නිසි ස්ථානය ලබාදීම සහ සියලු ආකාරයේ පුරුෂාධිපත්‍යය අවසන් කිරීම" බවයි.

ඔහු පෙන්වා දෙන්නේ සැබෑ සංගමනශීලී පරිවර්තනයක් සිදුවන්නේ ව්‍යුහාත්මක වෙනස්කම්වලින් පමණක් නොව, ශුභාරංචියේ ආලෝකය තුළ සවන් දීමට, එක්ව විමසා බැලීමට සහ වෙනස් වීමට ඇති සූදානම තුළින් බවයි.

"සංගමනශීලී පරිවර්තනය පිළිබඳ සභාව සැබෑ ලෙස බැරෑරුම් නම්, ආසියාවේ සභාව ගැඹුරු ආත්ම පරීක්ෂාවකට යොමු විය යුතුයි," යැයි ගරු සෙඩ්රික් ප්‍රකාශ් පියතුමා පැවසීය.

සංගමනශීලීත්වයේ අර්ථය පැහැදිලි කරමින් ඔහු සඳහන් කළේ එය ග්‍රීක භාෂාවේ 'Synodos' යන වචනයෙන් බිහිවූවක් වන අතර එහි අර්ථය "එකට ගමන් කිරීම" බවයි. එබැවින් සභාවේ මෙහෙවර පෞද්ගලික තීරණ මත නොව, එකමුතුව සිදුකරන විචාර බුද්ධිය මත පදනම් විය යුතු බවද ඔහු පැවසීය.

සභාව සැබෑ ලෙස සවන් දෙන ප්‍රජාවක් බවට පත්විය යුතු බව පෙන්වා දුන් ගරු සෙඩ්රික් ප්‍රකාශ් පියතුමා, දිළිඳුන්ගේ හඬට සවන් දීම, ගිහියන් සවිබල ගැන්වීම, යහපත් කැමැත්තක් ඇති සියලු දෙනා සමඟ සංවාදය ප්‍රවර්ධනය කිරීම, මැවිල්ල රැකගැනීම සහ අසාධාරණය, සූරාකෑම, ප්‍රචණ්ඩත්වය හා වෙනස්කොට සැලකීමට එරෙහිව පැහැදිලි ස්ථාවරයක් ගැනීම සභාවේ වගකීම බවද අවධාරණය කළේය.

පූජක කේන්ද්‍රගත ආකල්පය (Clericalism) පිළිබඳ අනතුරු ඇඟවූ ඔහු, සැබෑ සංගමනශීලී සභාවක් ගොඩනැගීමට නම් ගිහි කතෝලිකයන්ගේ ක්‍රියාකාරී සහභාගිත්වය අත්‍යවශ්‍ය බව සඳහන් කළේය.

මෑතකදී අවසන් වූ ලෝක සංගමනශීලී සමුළුවේ අවධාරණය වූ පරිදි, සභාවේ මෙහෙවරේ සෑම අංශයකම පෞද්ගලික හා ප්‍රජාමය පරිවර්තනය තුළින් සංගමනශීලීත්වය ජීවමාන විය යුතු බවද ඔහු සිහිපත් කළේය.

ෆ්‍රැන්සිස් ශුද්ධෝත්තම පියතුමා උපුටා දක්වමින් ඔහු පැවසුවේ, "සංගමනශීලීත්වය යනු එකට ගමන් කිරීමයි. එම ගමන තුළ අපි ශුද්ධාත්මයාණන්ගේ හඬට සවන් දී, වෙනස් වීමේ අවශ්‍යතාව නිහතමානීව පිළිගනිමු," යනුවෙනි.

එමෙන්ම XIV ලියෝ ශුද්ධෝත්තම පියතුමාගේ Magnifica Humanitas ප්‍රකාශනය උපුටා දක්වමින්, සංගමනශීලීත්වය සඳහා සභාව තුළ විනිවිදභාවය, වගවීම සහ හවුල් වගකීම අත්‍යවශ්‍ය බවත්, සභාවේ ව්‍යුහයන් එය ප්‍රකාශ කරන වටිනාකම් පිළිබිඹු කළ යුතු බවත් ඔහු සඳහන් කළේය.

ගරු සෙඩ්රික් ප්‍රකාශ් පියතුමා පෙන්වා දෙන්නේ මෙම මූලධර්ම පොදු යහපත, සහයෝගීතාව, උපකාරකත්වය (Subsidiarity), සමාජ සාධාරණත්වය සහ මැවිල්ල රැකගැනීම සඳහා සභාවට මඟපෙන්විය යුතු බවයි.

අවසානයේ ඔහු ප්‍රශ්න කළේ, "ශුද්ධාත්මයාණන්ගේ ආරාධනාවට සවන් දී, සංගමනශීලී පරිවර්තනයකට ලක්ව, පවසන දේ ජීවිතයෙන් ක්‍රියාවට නැංවීමට අවශ්‍ය දිවැසි ධෛර්යය මෙම ආසියානු රදගුරු සමුළු සම්මේලනයේ මහා සමුළුව සතුවේද?" යන්නයි.

සතියක් පුරා පැවැත්වෙන මෙම ආසියානු රදගුරු සමුළු සම්මේලනයේ 12 වැනි මහා සමුළුවට ආසියාව පුරා සිටින රදගුරුවරුන් එක්වී, සභාවේ එකමුතුකම, සහභාගිත්වය සහ ධර්මදූත මෙහෙවර තවදුරටත් ශක්තිමත් කරමින්, කලාපය මුහුණ දෙන සමාජීය, සංස්කෘතික හා එඬේර සේවා අභියෝගවලට ප්‍රතිචාර දක්වන ආකාරය පිළිබඳ විචාර බුද්ධියෙන් යුතුව මෙනෙහි කිරීමට නියමිතය.

#FABC2026 #FABC #Jakarta2026 #SriLanka #ChurchInAsia #BridgeBuilders #SynodalConversion #InterreligiousDialogue #CatholicChurch #RVASinhala #RadioVeritasAsia #CatholicNews