ඉන්දුනීසියානු රදගුරු සමුළුවේ සභාපති: "පාලම් තැනීමට පෙර සවන් දීමට ඉගෙන ගන්න"

ඉන්දුනීසියානු රදගුරු සමුළුවේ සභාපති: "පාලම් තැනීමට පෙර සවන් දීමට ඉගෙන ගන්න"

ආසියානු රදගුරු සමුළු සම්මේලනයේ (FABC) 12 වැනි මහා සමුළුව ජකර්තා නුවරදී ආරම්භ කරමින්, ඉන්දුනීසියානු කතෝලික රදගුරු සමුළුවේ සභාපති ඇන්ටෝනියස් සුබියාන්තෝ බුන්ජමින් හිමිපාණන් පැවසුවේ, සැබෑ සංගමනශීලී බව (Synodality) ආරම්භ වන්නේ දෙවියන් වහන්සේටත්, එකිනෙකාටත්, සමාජයේ අන්තයට තල්ලු වූවන්ගේ හඬටත් සවන් දීමෙන් බවයි.

"මෙම මහා සමුළුව රදගුරුතුමන්ලාගේ සාකච්ඡාවක් පමණක් නොවේ," යැයි ජූලි 21 දින හෝටල් මුලියා ජකර්තාහි රැස්ව සිටි නියෝජිතයන් අමතමින් ඇන්ටෝනියස් සුබියාන්තෝ බුන්ජමින් හිමිපාණන් පැවසීය. "මෙය ශුද්ධාත්මයාණන්ට, එකිනෙකාට සහ ආසියාවේ ජනතාවගේ හඬට සවන් දීම සඳහා වූ ශුද්ධ අවස්ථාවකි."

මෙම සමාරම්භක උත්සවයට ආසියාව පුරා සිටි සභා නායකයන්, රාජ්‍ය නිලධාරීන් සහ නියෝජිතයන් සහභාගී වූහ.

වේදිකාව මත ආසියානු රදගුරු සමුළු සම්මේලනයේ සභාපති ෆිලිප් නේරි ෆෙරාඕ කාදිනාල් හිමිපාණන්, උපසභාපති පැබ්ලෝ වර්ජිලියෝ ඩේවිඩ් කාදිනාල් හිමිපාණන්, මහලේකම් ටාසිසියෝ ඉසාවෝ කිකුචි කාදිනාල් හිමිපාණන් සහ ඉන්දුනීසියාවේ ආගමික කටයුතු අමාත්‍ය මහාචාර්ය ආචාර්ය නසරුදීන් උමාර් මහතා අසුන්ගෙන සිටියහ.

ඉන්දුනීසියාවට පැමිණි නියෝජිතයන් පිළිගනිමින් ඇන්ටෝනියස් සුබියාන්තෝ බුන්ජමින් හිමිපාණන් ප්‍රකාශ කළේ, ආසියාවේ ප්‍රාදේශීය සභාවන් අතර සහයෝගීත්වය හා එකමුතුව තවදුරටත් ශක්තිමත් කරමින්, ඉන්දුනීසියානු ආගන්තුක සත්කාරය ඔවුන්ට අත්විඳීමට හැකිවේවා යන්න තම බලාපොරොත්තුව බවයි.

1990 වසරේ ඉන්දුනීසියාවේ බන්දුන්ග් නුවර පැවති ආසියානු රදගුරු සමුළු සම්මේලනයේ මහා සමුළුවේදී ආසියානු සභාවේ අනන්‍යතාව ලෙස "ත්‍රිත්ව සංවාදය" (Triple Dialogue) හඳුන්වා දුන් බවද එතුමා සිහිපත් කළේය. එනම්, දිළින්දන් සමඟ, සංස්කෘතීන් සමඟ සහ අනෙකුත් ආගම් සමඟ සංවාදයයි. අද වන විට මැවිල්ල රැකබලා ගැනීමද සභාවේ මෙහෙවරේ අත්‍යවශ්‍ය මානයක් බවට පත්ව ඇති බව එතුමා සඳහන් කළේය.

සවන් දීම, සහයෝගීතාව සහ පොදු දැක්මක් තුළින් තම සංගමනශීලී පරිවර්තනය ගැඹුරු කරගන්නා ලෙසද එතුමා සහභාගිවන්නන්ට ආරාධනා කළේය.

මෑත කාලීන පාප්වරුන්ගේ ඉගැන්වීම්ද සිහිපත් කළ ඇන්ටෝනියස් සුබියාන්තෝ බුන්ජමින් හිමිපාණන් සඳහන් කළේ, කතා කිරීමට පෙර සවන් දෙන, විනිශ්චය කිරීමට පෙර මිනිසුන් සමඟ ගමන් කරන සභාවක් පිළිබඳව ශුද්ධෝත්තම ෆ්‍රැන්සිස් පාප්තුමන් අවධාරණය කළ බවයි. එම දැක්ම ශුද්ධෝත්තම ලියෝ XIV පාප්තුමන් ද සංවාදය, විවෘතභාවය සහ ප්‍රේමය තුළින් පාලම් තනන සභාවක් වීමට ආරාධනා කරමින් යළිත් තහවුරු කර ඇති බවද එතුමා පැවසීය.

සමාරම්භක උත්සවයේ කොටසක් ලෙස නුසන්තරා නර්තන කණ්ඩායම සුමාත්‍රා, ජාවා සහ නුසා ටෙන්ගරා ප්‍රදේශ නියෝජනය කරන සම්ප්‍රදායික නර්තන ඉදිරිපත් කළ අතර, එමඟින් ඉන්දුනීසියාවේ සංස්කෘතික විවිධත්වය ප්‍රකාශ කරමින් ආසියාවේ නියෝජිතයන් පිළිගනු ලැබීය.

මෙම මහා සමුළුව සාර්ථකව සංවිධානය කිරීම සඳහා සහයෝගය ලබාදුන් ඉන්දුනීසියානු රජයට, විශේෂයෙන් ආගමික කටයුතු අමාත්‍යාංශයට, ආගමික නායකයන්ට, ස්වේච්ඡා සේවකයන්ට, අනුග්‍රාහකයන්ට සහ සංවිධාන කමිටුවටද ඇන්ටෝනියස් සුබියාන්තෝ බුන්ජමින් හිමිපාණන් සිය කෘතඥතාව පළ කළේය. ඔවුන්ගේ සහයෝගීතාව සංගමනශීලීත්වයේ සැබෑ ප්‍රකාශනයක් බවද එතුමා සඳහන් කළේය.

සිය දේශනය අවසන් කරමින්, මෙම මහා සමුළුව ශුද්ධාත්මයාණන්ගේ මඟපෙන්වීමට භාර කළ එතුමා, ආසියාවේ ප්‍රාදේශීය සභාවන් ශක්තිමත් කිරීමටත්, ගිහි ජනතාව හා තරුණයන් සවිබල ගැන්වීමටත්, මැවිල්ල රැකබලා ගැනීම ගැඹුරු කිරීමටත්, සභාවේ සාක්ෂිය අලුත් කිරීමටත් මෙම මහා සමුළුව හේතුවේවායි ප්‍රාර්ථනා කළේය.

අවසානයේ එතුමා මෙසේ යාච්ඤා කළේය.

"අප සාමයේ උපකරණ බවට පත් කළ මැනව. ආසියානු රදගුරු සමුළු සම්මේලනයද සාමයේ උපකරණයක් බවට පත් කළ මැනව. එවිට අපි මීටත් වඩා උතුම් දේ දකින්නෙමු."

කර්තෘ පිළිබඳව:
අමාඩියා ප්‍රනාස්තිති (Amadea Pranastiti) ඉන්දුනීසියානු රදගුරු සමුළුවේ ලේඛන හා තොරතුරු අංශයට නිදහස් දායකත්වය සපයන සමාජ සන්නිවේදන ක්‍රියාකාරිනියකි.

#XIIFABCPlenary #FABC #CatholicBishopsConferenceOfIndonesia #BishopAntoniusSubiantoBunjamin #LearnToListen #BridgeBuilding #SynodalConversion #Jakarta #Indonesia #RVAsia #RVASinhala #RadioVeritasAsia