ආසියාවේ විවිධත්වය සභාවේ ශක්තියයි. - FABC සභාපති, ෆෙරාඕ කාදිනල් හිමිපාණන්
ආසියානු රදගුරු සමුළු සම්මේලනයේ (FABC) සභාපති ෆිලිප් නේරි ෆෙරාඕ කාදිනල් හිමිපාණන් පැවසුවේ, ආසියාවේ සංස්කෘතික, භාෂාමය සහ සම්ප්රදායික විවිධත්වය සභාවේ විශාලතම ශක්තියක් වන අතර, එය ආසියාවේ ප්රාදේශීය සභාවන් එකම මෙහෙවරක් තුළ එක්සත් කරන දෙවියන්වහන්සේගේ දානයක් බවයි.
ජූලි 21 දින ජකර්තාහි හෝටල් මුලියාහි පැවති ආසියානු රදගුරු සමුළු සම්මේලනයේ 12 වැනි මහා සමුළුවේ සමාරම්භක උත්සවය අමතමින් ෆිලිප් නේරි ෆෙරාඕ කාදිනල් හිමිපාණන් සඳහන් කළේ, විවිධ සංස්කෘතීන්, භාෂා සහ සම්ප්රදායන් එකමුතුව තුළ එකට එක්වන ආසියානු සභාවේ සුන්දරත්වය මෙම මහා සමුළුව තුළින් මනාව පිළිබිඹු වන බවයි.
"ආසියානු මහද්වීපය එහි වර්ණවත් විවිධත්වය සහ අලංකාරය නිසා සුවිශේෂී බව මට වෙන කවරදාටත් වඩා දැඩි ලෙස විශ්වාසයි. ආසියාවේ අපි විවිධත්වය තුළ එකමුතුකම සමරන්නෙමු," යැයි ෆෙරාඕ කාදිනාල් හිමිපාණන් පැවසූහ.
ඉන්දුනීසියාවේ සම්ප්රදායික සංගීතය, නර්තනය සහ දිව්ය පූජාව තුළින් එරට සංස්කෘතික උරුමය ඉස්මතු කළ සමාරම්භක සැමරුමෙන් අනතුරුව එතුමා මෙම අදහස් පළ කළේය.
මෙවැනි සංස්කෘතික ප්රකාශනයන් විවිධත්වය බාධාවක් නොව, ආසියාව පුරා සභාවේ සාක්ෂිය ශක්තිමත් කරන දානයක් බව පැහැදිලි කරන බවද එතුමා සඳහන් කළේය.
ආසියානු රදගුරු සමුළු සම්මේලනයේ ඉතිහාසය සිහිපත් කළ ෆෙරාඕ කාදිනාල් හිමිපාණන්, 1970 වසරේ ශුද්ධෝත්තම හයවැනි පාවුළු පාප්තුමන්ගේ පිලිපීන සංචාරයෙන් අනතුරුව මෙම සම්මේලනය ආරම්භ වූ බවත්, එම සංචාරය ආසියාවේ රදගුරුතුමන්ලා අතර සමීප සහයෝගීතාවකට මඟ පෑදූ බවත් පැවසූහ. එමෙන්ම ශුද්ධ ජුවාම් පාවුළු II පාප්තුමන් සහ ශුද්ධෝත්තම ෆ්රැන්සිස් පාප්තුමන්ගේ ආසියානු සංචාර ද විශ්ව සභාවේ ආසියාව කෙරෙහි ඇති සමීපත්වය තහවුරු කළ බවද එතුමා සඳහන් කළේය.
සැහැල්ලු අවස්ථාවක් සිහිපත් කරමින්, 2015 වසරේ ශුද්ධෝත්තම ෆ්රැන්සිස් පාප්තුමන්ගේ ශ්රී ලංකා සහ පිලිපීන සංචාරය අතරතුර සිදුවූ සිදුවීමක්ද එතුමා බෙදාගත්තේය. පිලිපීනයේ ජේසු නිකායික ප්රාදේශීය නායකයෙකු, ශ්රී ලංකාව මෙන් අලි 25 දෙනෙකුගෙන් පාප්තුමන් පිළිගැනීමට නොහැකි වුවද, ඒ වෙනුවට ජේසු නිකායික ශිෂ්ය පූජකවරුන් 25 දෙනෙකු ඉදිරිපත් කරන බව විහිළුවට පැවසූ බවත්, ඊට පිළිතුරු දෙමින් පාප්තුමන් සිනාසෙමින් "ශ්රී ලංකාවේ අලි වඩාත් හොඳින් සැරසී සිටියා" යැයි පැවසූ බවත් සිහිපත් කළ අතර, එය රැස්ව සිටි පිරිස අතර සිනහවක් ඇති කළේය.
ආසියානු රදගුරු සමුළු සම්මේලනය වෙනුවෙන්, මෙම මහා සමුළුව සාර්ථකව සංවිධානය කිරීම වෙනුවෙන් ඉන්දුනීසියානු කතෝලික රදගුරු සමුළුවට ෆෙරාඕ කාදිනාල් හිමිපාණන් සිය කෘතඥතාව පළ කළේය.
"මෙම මහා සමුළුව ඉතා සාර්ථකව පැවැත්වීමටත්, අපට සැබවින්ම නිවසේ සිටින හැඟීමක් ලබාදීමටත් විශිෂ්ට ලෙස සියලු කටයුතු සූදානම් කළ ඉන්දුනීසියානු කතෝලික රදගුරු සමුළුවට අපි ගැඹුරු කෘතඥතාව පළ කරමු," යැයි එතුමා පැවසූහ.
මහා සමුළුව සඳහා නියෝජිතයන්ගේ පැමිණීම පහසු කරමින් සහ සියලු කටයුතු සාර්ථකව සිදු කිරීමට සහාය දැක්වූ ඉන්දුනීසියානු රජයටත්, විශේෂයෙන් ආගමික කටයුතු අමාත්ය නසරුදීන් උමාර් මහතාටත් එතුමා සිය ස්තුතිය පළ කළේය.
සමාරම්භක උත්සවයේදී නුසන්තරා නර්තන කණ්ඩායම සුමාත්රා, ජාවා සහ නුසා ටෙන්ගරා ඇතුළු ඉන්දුනීසියාවේ විවිධ ප්රදේශ නියෝජනය කරන සම්ප්රදායික නර්තන ඉදිරිපත් කළ අතර, එමඟින් ආසියාව පුරා සිට පැමිණි නියෝජිතයන් පිළිගනිමින් විවිධත්වය තුළ එකමුතුකම යන මහා සමුළුවේ තේමාවද ප්රකාශයට පත් කළේය.
සිය දේශනය අවසන් කරමින් ෆෙරාඕ කාදිනාල් හිමිපාණන් ඉන්දුනීසියාවට, එරට ජනතාවට සහ නායකයන්ට දෙවියන්වහන්සේගේ ආශීර්වාදය ප්රාර්ථනා කළ අතර, මෙම මහා සමුළුව ආසියාවේ ප්රාදේශීය සභාවන් අතර එකමුතුකම තවදුරටත් ශක්තිමත් කරනු ඇතැයි බලාපොරොත්තු පළ කළේය.
ආසියාවේ බොහෝ භාෂා, සංස්කෘතික සම්ප්රදායන් සහ ජාතික අනන්යතා තිබුණද, එම විවිධත්වයම සභාවේ මෙහෙවර ශක්තිමත් කරන එකමුතුකමේ මූලාශ්රයක් බව ලෝකයට සාක්ෂි දැරීමට මෙම මහා සමුළුව අවස්ථාවක් වන බවද එතුමා අවධාරණය කළේය.
කර්තෘ පිළිබඳව:
අමාඩියා ප්රනාස්තිති (Amadea Pranastiti) ඉන්දුනීසියානු රදගුරු සමුළුවේ ලේඛන හා තොරතුරු අංශයට නිදහස් දායකත්වය සපයන සමාජ සන්නිවේදන ක්රියාකාරිනියකි.
#XIIFABCPlenary #FABC #CardinalFilipeNeriFerrao #AsiasRichDiversity #UnityInDiversity #Jakarta #Indonesia #CatholicChurch #RVAsia #RVASinhala #RadioVeritasAsia
