ආදරයේ භාෂාවෙන් සාමය ගොඩනඟන්න. - ආසියාවේ ආගමික නායකයන්ට ඉන්දුනීසියානු ආගමික කටයුතු අමාත්‍යවරයාගේ ඇරයුම

ආදරයේ භාෂාවෙන් සාමය ගොඩනඟන්න. - ආසියාවේ ආගමික නායකයන්ට ඉන්දුනීසියානු ආගමික කටයුතු අමාත්‍යවරයාගේ ඇරයුම

ඉන්දුනීසියාවේ ආගමික කටයුතු අමාත්‍ය මහාචාර්ය ආචාර්ය KH. නසරුද්දීන් උමාර් මහතා, ආසියාව පුරා ආගමික ප්‍රජාවන්ගෙන් ඉල්ලා සිටියේ ගැටුම් විසඳීමටත්, සාමය ශක්තිමත් කිරීමටත් "ආදරයේ භාෂාව" වැළඳ ගන්නා ලෙසයි. ඇදහිල්ල බෙදීම් ඇති කරන බලවේගයක් නොව, එක්සත් කරන බලවේගයක් විය යුතු බවද ඔහු අවධාරණය කළේය.

ජූලි 21 වැනිදා ජකාර්තා මුලියා හෝටලයේ පැවති ආසියානු රදගුරු සමුළු සම්මේලනයේ (FABC) 12 වැනි මහා සමුළුවේ සමාරම්භක උත්සවය අමතමින් අමාත්‍යවරයා සඳහන් කළේ, මෙම සමුළුව කතෝලික සභාවේ අභ්‍යන්තර රැස්වීමක් පමණක් නොව, සාමය වර්ධනය කිරීම, සහයෝගීතාව ශක්තිමත් කිරීම සහ ආසියාවට වඩාත් යුක්තිසහගත හා සැමට අයත් අනාගතයක් ගොඩනැගීම සඳහා වූ පොදු කැපවීමක් බවයි.

"මෙම හමුව අප සියලුදෙනාගේ සාමය පෝෂණය කිරීමේ, ජනතාව අතර සහෝදරත්වය ශක්තිමත් කිරීමේ සහ වඩාත් සාමකාමී, යුක්තිසහගත හා සැමට අයත් ආසියාවක් ගොඩනැගීමේ ඒකාබද්ධ උත්සාහයේ කොටසකි," යැයි ඔහු ආසියාව පුරා සිට පැමිණි කාදිනල්වරුන්, රදගුරුවරුන්, පූජකවරුන්, පැවිදිවරුන් සහ ගිහි නියෝජිතයන් පිළිගනිමින් පැවසීය.

ආසියාවේ සංස්කෘතික, භාෂාමය සහ ආගමික විවිධත්වය ශක්තියක් මෙන්ම වගකීමක්ද බව සඳහන් කළ අමාත්‍යවරයා, සන්නද්ධ ගැටුම්, සමාජ ධ්‍රැවීකරණය, ආගමික අන්තවාදය, අසමානතාව, දේශගුණික විපර්යාස, සංක්‍රමණය සහ කෘත්‍රිම බුද්ධියේ වේගවත් වර්ධනය වැනි සංකීර්ණ අභියෝගවලට ආසියාව මුහුණ දෙන බව පෙන්වා දුන්නේය.

එවැනි අභියෝග දේශපාලනික හෝ ආර්ථික විසඳුම්වලින් පමණක් ජයගත නොහැකි බවද ඔහු අවධාරණය කළේය.

"ගැටුම් සහ වෙනස්කම් විසඳිය හැක්කේ ආගමේ භාෂාවෙන්, එනම් ආදරයේ භාෂාවෙන් බව මම විශ්වාස කරමි. ආදරය අපට දයාව, අනුකම්පාව සහ වෛරය ඇති නොකර වෙනස්කම් වැළඳ ගැනීමට හැකියාව උගන්වයි," යැයි ඔහු පැවසීය.

ඇදහිල්ල සැමවිටම එකමුතුකම, සංවාදය සහ ප්‍රතිසන්ධානය ප්‍රවර්ධනය කරන මූලාශ්‍රයක් ලෙස පවත්වා ගැනීම ආගමික නායකයන්ගේ වගකීමක් බවද අමාත්‍යවරයා සඳහන් කළේය.

දූපත් 17,000කට අධික සංඛ්‍යාවකින්, ජනවාර්ගික කණ්ඩායම් සිය ගණනකින් සහ විවිධ ආගමික සම්ප්‍රදායන්ගෙන් සමන්විත ඉන්දුනීසියාව, විවිධත්වය ජාතික ශක්තියක් ලෙස ප්‍රවර්ධනය කරන රටක් බවද ඔහු පෙන්වා දුන්නේය.

ඒ සඳහා උදාහරණයක් ලෙස 2024 වසරේදී ෆ්‍රැන්සිස් ශුද්ධෝත්තම පියතුමා සහ මුස්ලිම් ආගමික නායකයන් එක්ව අත්සන් කළ ඉස්තික්ලාල් ප්‍රකාශනය සහ ජකාර්තාහි ඉස්තික්ලාල් මුස්ලිම් දේවස්ථානය හා ස්වර්ගාරෝහණ මාතා ආසන දෙව්මැදුර සම්බන්ධ කරන "මිත්‍රත්වයේ උමඟ" ඉදිකිරීමද ඔහු සිහිපත් කළේය.

"ආගමික හා සංස්කෘතික විවිධත්වය සාමකාමීව සමරමින් එය පොදු ශක්තියක් බවට පත් කළ හැකි බව ලෝකයට පෙන්වීමට ඉන්දුනීසියාව කැමැත්තෙන් සිටී," යැයි ඔහු පැවසීය.

"සංගමනශීලී පරිවර්තනය සඳහා වූ කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර" යන මෙවර සමුළුවේ තේමාව පිළිබඳව අදහස් දැක්වූ නසරුද්දීන් උමාර් මහතා පැවසුවේ, සභාවේ සංගමනශීලීභාවය පිළිබඳ අවධාරණය ඉන්දුනීසියාවේ දිගුකාලීන Musyawarah (එකඟතාව මත තීරණ ගැනීම) සහ Gotong Royong (අන්‍යෝන්‍ය සහයෝගීතාව) යන සම්ප්‍රදායන් සමඟ මනාව ගැළපෙන බවයි.

මෙම මහා සමුළුව ආගමික සංවාදය තවදුරටත් ශක්තිමත් කරමින්, මානුෂීය සහයෝගීතාව වර්ධනය කරමින්, ආසියාව පුරා සාමය වෙනුවෙන් නව වැඩසටහන් බිහි කරනු ඇතැයිද ඔහු බලාපොරොත්තු පළ කළේය.

"ජකාර්තාව සාමය සඳහා නව අදහස් බිහිවන ස්ථානයක් වේවා. මෙම හමුව සහෝදරත්වයේ බැඳීම් ශක්තිමත් කරත්වා. විවිධත්වය බෙදීම්වලට නොව ශක්තියට හේතුවක් බව ආසියාව ලෝකයට තවදුරටත් පෙන්වා දෙත්වා," යැයි ඔහු ප්‍රාර්ථනා කළේය.

අනතුරුව නසරුද්දීන් උමාර් මහතා විසින් ආසියානු රදගුරු සමුළු සම්මේලනයේ 12 වැනි මහා සමුළුව නිල වශයෙන් විවෘත කරන ලදී.

කර්තෘ ගැන:
අමඩියා ප්‍රනාස්තිති සමාජ සන්නිවේදන ක්ෂේත්‍රයේ ක්‍රියාකාරිනියක් වන අතර, වර්තමානයේ ඉන්දුනීසියානු රදගුරු සමුළුවේ ලේඛන හා තොරතුරු අංශයේ නිදහස් දායකයෙකු ලෙස කටයුතු කරයි.

#XIIFABCPlenary #FABC #NasaruddinUmar #LanguageOfLove #HotelMuliaJakarta #PopeFrancis #InterreligiousDialogue #SynodalConversion #BridgeBuilders #Peace #Indonesia #Jakarta #CatholicChurch #Asia #RVAsia #RVASinhala #RadioVeritasAsia