ස්නාවක ජොහාන් හෙවත් එලියාගේ පුනරාගමනය

*උපත සිදුවූ සමය..
ජනතා විසින් දිවැසිවරයකු යැයි විශ්වාස කළ ස්නාවක ජොහාන් තුමා උපත ලබන්නේ ජුදා දේශයේ කඳුකරයේ එයින් කාරෙම් නම් නුවරදීය.
ඒ ක්‍රිස්තු පූර්ව 37 ත් ක්‍රිස්තු  වර්ෂ 4 ත් අතර රජ කළ මහා හෙරෝද් රජතුමාගේ කාලයේදී ය. එකල රෝමය පාලනය කළේ අගෝස්තුස් අධිරාජයා විසිනි. ක්‍රි.පූ 28 - ක්‍රි. ව 14)

*පවුල් පසුබිම.. 
ස්නාවක ජොහාන් තුමාගේ උපත හා නාමය පිළිබඳව දැනුම් දෙනු ලබන්නේ දේව මාලිගයේදී ගාබ්‍රියෙල් දේවදූතයා විසිනි.ඒ ඔහුගේ පියා වූ සෙකරිස්ට ය. 
සෙකරියස් දාවිත් රජුගේ කාලයේ පටන් දේව මාලිගාවේ සේවයට සම්ප්‍රදායිකව කැප වූ පූජක පවුල් 24න් 8 වැනි පවුල වූ අබියාගේ පේරුවට අයත් පූජකයෙකි. 
වරකට  සතිය බැගින් පූජක පවුලක් අවුරුද්දකට දේවරක් දේව මාලිගාවෙහි සේවය කිරීම එකල සිරිත විය .
සමිඳුන්ට දුම් පූජා කිරීමේ අවස්ථාව උදා කරදෙනු ලැබුවේ නායක පූජකවරයා විසිනි. ඒ දාදු දැමීමෙනි. නායක පූජකයාගේ ඒපොද් සැට්ටයේ  ළය මත වූ සාක්කුවේ දාදු කැට දෙකක් තිබූ අතර එම දාදු කැට කුඩා ගල් වලින් හෝ ලී කැබලි වලින් සාදා තිබුණි.
එකල දාදුව සෙකරියස්ට වැටීම නිසා අතී  ශුද්ධස්ථානයේ දුම් පූජා කිරීමේ අවස්ථාව ඔහුට හිමි විය. 
ඔහුට ගාබ්‍රියෙල් දේවදූතයා දර්ශනය වන්නේ උදෑසන නමයට පූජාව පවත්වන අවස්ථාවේ අති ශුද්ධස්ථානයේ දුම් පූජාසනය  දකුණු පස ස්ථානයේදී ය.
"ජොහාන්" යන නාමයෙහි අර්ථය වන්නේ "දෙවිදාණෝ දයාවන්තය" නොහොත් "කරුණාශීලීය" යන්නයි.

*ජොහාන්ගේ නාසරිය බව..
ජොහාන් මුළු ජීවිත කාලයටම නාසරීය බාරයට කැප වූ පුද්ගලයෙක් විය.
නාසරීය බාරය වූ පුද්ගලයින් හිසකෙස් කැපීමෙන් වැළකීමත් මිදියුෂ පානයෙන් වැළකීමත් මළ සිරුරු වැනි අපවිත්‍ර දේ ස්පර්ශ කිරීමෙන් ශරීරය අපවිත්‍ර කර නො ගැනීමත්  අනිවාර්ය කාරණයක් විය.

*දිවැසිවර එළියා සහ ජොහාන් ගේ  සම්බන්ධතාවය..
ජොහාන් දිවැසිවර එළියාමෙන් පාළුකරයේ තාපස දිවියක් ගත කළ අතර වන මී සහ පළගැටියන් ආහාරයට ගත් කටුක දිවියක් ගෙවනු ලැබීය. ඔහුගේ වස්ත්‍ර වූයේ ඉණ වට හම් පටියකින් බැඳි ඔටු ලොම් වස්ත්‍රයකි. 

*දේව අනාවරණය..
පාළුකරයේ තාපස දිවියක් ගත කළ ජොහාන් හට දෙවියන් වහන්සේගේ පණිවිඩය ලැබිණ. 
එවිට ඔහු ට ජෝර්දාන් ගඟ අවට දේශනා කරමින් පැවසූයේ පසුතැවී සිත් හරවා ගැනීමටයි, භෞතිස්ම ස්නාපනය ලැබීමටයි. 
පසුතැවීම හෙවත් 'මෙටනොයියා' යන ග්‍රීක වචනයේ අර්ථය වන්නේ 'සිතිවිල්ලේ සහ හැසිරීමේ පූර්ණ වෙනස් වීමකි'. 
මේ අතර ජොහාන් ගේ අනුශාසනා අසන්නට සහ ප්‍රශ්න කරන්නට සාමාන්‍ය ජනතාව, සෙබලුන්, පරිසිවරුන්, ලෙවීවරුන් හා පූජකයින් ද නිරන්තරයෙන් පැමිණියහ .
ජේසුස් වහන්සේ ද ඔහු වෙත පැමිණ භෞතිස්ම ස්නාපනය ලැබුවේ ද එහිදී යි. 

*ජොහාන් හා ජේසුස් වහන්සේගේ ඥාතිත්වය..
ඔහුගේ මව වූ එලිසබෙත් ආරොන්ගේ පෙළපතින් පැවතෙන්නියක වූ අතර ජේසු තුමන්ගේ මව වූ මරිය තුමියගේ ඥාතිවරියකද වූවාය. 
එලිසබෙත් ගර්භනී සමයේදී ඇයට උපකාර කිරීම පිණිස කිලෝමීටර 90ක් දුර ගෙවාගෙන මරියතුමිය එයින් කාරෙම් වෙත පැමිණි බැව් ශුද්ධ ලියවිල්ලේ සඳහන් වේ. ඇය තෙමසක් එලිසබෙත් සමග නතර වී ඇයට ඇප උපස්ථාන කර තිබේ. 
ජේසුස් වහන්සේ ස්නාවක ජොහාන් ව නිරන්තරයෙන් අගය කරනු ලැබීය. 
"මුළු මිනිස් සංහතිය තුළ ස්නාවක ජොහාන්ට වඩා කෙනෙකු පහළ නොවූ බවත්, කැමති නම් එන්නට සිටින එළියා ජොහාන් බවත්"..ජේසුස්  වහන්සේ ප්‍රකාශ කර තිබේ .

*ස්නාවක ජොහන්ගේ අවසාන සමය ..
යුවරජ වූ පිලිප්ගේ හාර්යාව වන හෙරෝදියස් ව හෙරෝද් ඇන්තිපස් විසින් සරණ පාවා ගැනීම ජොහාන් හෙළා දුටුවේය .
මේ නිසා ස්නාවක ජොහාන් කෙරෙහි වෛර බදින හෙරෝදියස් තම දියණිය වූ සලෝමි හරහා හෙරෝද් ගේ උපන්දින සාදයේ දී ජොහන්ගේ හිස ඉල්ලා සිටි අතර මළ  මුහුදට නැගෙනහිරින් පිහිටි පෙට්ට්‍රා හී බලකොටුවක දි ජොහාන්ගේ හිස ගස්වා ඝාතනය කර සලෝමී වෙත ජොහන්ගේ හිස ලබා දී තිබේ . අනතුරුව ජොහාන් ගේ අනුගාමිකයින් ඔහුගේ සිරුර භූමදාන කර ඒ බැව් ජේසු තුමන්ට දන්වා තිබේ. 

*ඉදිව ඇති සිහිවටන...
එසේ ප්‍රාණ පරිත්‍යාගෙවූ ස්නාවක ජොහන්ගේ ශුද්ධ වූ ධාතු ශුද්ධ වූ 'කරපාට්' තාපසාරාමයේ තැන්පත් කර තිබේ. 
මරියතුමිය එලිසබෙත් තුමිය බැහැදුටු සෙකරියස් ගේ ගිම්හාන නිවස පිහිටි 'එයින් කාරෙම්' නුවර ස්නාවක ජොහාන් තුමන් උපන් ස්ථානය වට කොට මහා දෙව් විමනක් ඉදිකොට ඇත. තවද දමස්කයේ සහ බටහිර ඉවුරේ ඉස්ලාම් දෙව් මැදුරු වලදී ද  එතුමා සමරනු ලැබේ . 

*නාම ශාන්තුවරයා.. 
ස්නාවක ජොහාන් තුමන් රටවල් ගණනාවක නාම ශාන්තවරයා ලෙස සැලකෙන අතර ජෝර්දානය, පොටෝරිකෝ රාජ්‍යය, සෙන් ජුවන් ප්‍රධාන වන  අතර  ප්‍රංශය, කැනඩාව එංගලන්තේ කොන්චෝල් හී ද ස්කොට්ලන්තයේද නාම ශාන්තවරයා ලෙසින් එතුමන් ගරු බුහුමන් ලබයි.

#JohnTheBaptist #RVASinhala
'RVASinhala' Facebook, Instagram, X, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!