ලූර්දු හි නිර්මල පිළිසිඳීමේ දේව මාතාවන් දර්ශනය වීම

ලූර්දු හි නිර්මල පිළිසිඳීමේ දේව මාතාවන් දර්ශනය වීම

ප්‍රංශයේ ලූර්දු නගරයේ මසබියෙල් (Massabielle) පර්වතයේ දර්ශනය වූ "නිර්මල පිළිසිඳීමේ මාතාවන්" හෙවත් 'ලූර්දු මාතාවන්ගේ' නාමය මුළු ලෝකය පුරාම ඉතාමත් ප්‍රචලිත වූ දේවමාතාවන් ලත් අති සුවිශේෂ වූ නාමයකි.

වර්ෂ 1844 ජනවාරි 7 දින බර්නදෙත් සුබිරු (Bernadette Soubirous) උපන්නේ ප්‍රංශයේ ලූර්දු නගරයේ ජීවත් වූ ඉතා දුප්පත් පවුලකය. එනමුදු දේව මාතාවන් 18 වරක් ම වර්ෂ 1858 දී තම දෑසින්ම දැක ගැනීමේ භාග්‍යය මෙම දියණිය ලැබුවාය.

වර්ෂ 1858 පෙබරවාරි 11 මසබියෙල් පර්වතය අසලට දර කඩන්නට ඇයත්, ඇගේ නැඟණිය වූ තුවානෙට් (Toinette) සහ අසල්වැසි යෙහෙලියක් වූ ජීන් අබාධි (Jeanne Abadie) නික්ම ගියෝය. මසබියෙල් පර්වතය අසලින් ගලන දිය දහර බර්නදෙත් තරණය නොකළේ ඇය ඇදුම රෝගීන් පෙලුණු නිසාය. අනෙක් දෙදෙනා දර කඩන්නට ගිය අතර බර්නදෙත් මසබියෙල් පර්වතය අසල නැවතුණා ය. එවිට වයස අවුරුදු 14ක් වූ මෙම කුඩා දියණිය ඉතා සුවිශේෂ වූ ආලෝක ධාරාවකින් මසබියෙල් පර්වතය වැසී යන අයුරු හා සුළි සුළඟක් ඇති වන විට නැගෙන හඬකින් පරිසරය පිරී ගිය අයුරුත් දුටුවාය. ඒ සැනෙන් පර්වතයේ සුදෝ සුදු ඇඳුමින් හා හිස පලදනාවකින් ද, බඳවටා නිල් පටියකින් සැරසුණු අතෙහි ජපමාලය රැගත් ඉතා 'සුන්දර වූ කාන්තාවක්' ඇයට දර්ශනය වූවාය.

මෙම අත්දැකීම තම නැගණියට හා යෙහෙළියට කීව ද ඔවුන් එය පිළිගත්තේ නැත. එලෙසම බර්නදෙත්ගේ මව එය දැනගත් විට එය බර්නදෙත්ගේ මනංකල්පිත කතාවක් ලෙස ඇය දුටුවාය. දින දෙකකට පසුව එනම් පෙබරවාරි 14 වන දින නැවතත් බර්නදෙත් හා නැගණියත්, ඔවුන්ගේ යෙහෙලියත් මසබියෙල් පර්වතය අසලට පැමිණි අතර එදින බර්නදෙත් පැමිණියේ ආසිරි පැන් ද සමගය. මෙහි දර්ශනය වන්නේ භූතයෙක් නම් ආසිරි පැන් ඉසින විට එම භූතයා පලා යනු ඇති බව බර්නදෙත්ගේ විශ්වාසය විය. බර්නදෙත් විශ්වාස කළ ලෙසම දෙවන වරටත් එම 'සුන්දර කාන්තාව' දර්ශනය වූ විටදී ඇය ආසිරි පැන් ඉසින ලද නමුත් එම 'සුන්දර කාන්තාව' සුන්දර වූ සිනහවකින් පමණක් ඇයට සංග්‍රහ කළාය.

බර්නදෙත්ට නැවතත් එම සුන්දර කාන්තාව පෙබරවාරි 18 වන දින දී දර්ශනය වී දින පහළවක් එක දිගටම එම ස්ථානයට පැමිණ යාච්ඤා කරන ලෙස ඇයගෙන් ඉල්ලුවාය. සිද්ධිය ගම තුළ ප්‍රචාරය වූ අතර ඒ නිසාම බර්නදෙත්ට මසබියෙල් පර්වතය අසලට යාමට තහංචි පැනවුණි. නමුත් එම තහංචි නොසලකා බර්නදෙත් දිගටම දර්ශනය වූ එම 'සුන්දර කාන්තාවගේ' ඉල්ලීම ඉටුකිරීමට මසබියෙල් පර්වතය අසලට පැමිණියාය. පෙබරවාරි 19 දින සිදුවූ හතරවන දර්ශනයේදී බර්නදෙත්ගේ පවුලම එම අත්දැකීම ලැබූ අතර එතෙක් එය බර්නදෙත්ගේ මනංකල්පිතයක් ලෙස සිතූ බර්නදෙත්ගේ පවුලේ අය ඇය කියූ දේ පිළිබඳ විශ්වාස කරන්නට පටන් ගත්හ.

පෙබරවාරි 20 වන දින සිදු වූ පස්වන දර්ශනයේදී ආශිර්වාද කරන ලද ඉටි පන්දමක් රැගෙන ඇවිත් යාච්ඤා කරන ලෙස මෙම 'සුන්දර කාන්තාව' ඇයගෙන් ඉල්ලා සිටියාය. අදටත් ලූර්දු ගුහාව අසලට පැමිනෙන සියලු දෙනා ඉටිපහන් ඇතිව දෙවිඳුන් යදින අයුරු සැමදා අපට දැක ගත හැක.
පෙබරවාරි 21 සිදුවූ හයවන දර්ශනයේ දී බොහෝ පිරිසක් එම ස්ථානයේ රැස්ව සිටි අතර පව්කාරයින්ගේ ජීවිත වෙනස් වීම සඳහා යාච්ඤා කරන ලෙස ඉල්ලා සිටින්නේ එම දර්ශනයේ දී ය. හත්වන දර්ශනය සිදු වූ පෙබරවාරි 23 බර්නදෙත් හට රහස් තුනක් දේවමාතාවන් ප්‍රකාශ කොට ඇති නමුත් කිසිදිනක බර්නදෙත් ඒ රහස් මොනවා දැයි හෙළි කළේ නැත.

අටවන දර්ශනය පෙබරවාරි 24 සිදුවූ අතර 'පශ්චත්තාපය' යන වදන තුන් වරක් ඇය ප්‍රකාශ කොට ඇත. දේවමාතාවන්ගේ දර්ශනය වීම තුළ ඇයගේ අභිලාෂය වූයේ ජීවිත වෙනස් කරගැනීම බව මින් ඉතාමත්ම පැහැදිලිය.

නමවන දර්ශනය සිදු වූ පෙබරවාරි 25 වන දින මසබියෙල් පර්වතය අසල ඇති දිය උල්පතින් වතුර පානය කරන්නටත් ස්නානය කරන ලෙසත්, ඇය ඉල්ලා සිටියා ය. එවිට ඒ අසල දිය පහරක් නොතිබුණු බැවින් බර්නදෙත් තම දෑතින් පොළව හාරන්නට පටන් ගත් විට දිය උල්පතක් මතු විය. අදටත් එම ස්ථානයේ දිය උල්පත දැක ගත හැකි අතර දිනකට ගැලුම් 27000 ක පමණ ඉන් ජලය සැපයෙන අතර ලූර්දු පැමිණෙන සියලු දෙනා පානය කරන්නේ සහ ස්නානය කරන්නේ මෙම ජලයෙනි. පෙබරවාරි 28 වන දින සිදුවූ එකොළොස් වන දර්ශනයේදී එම ස්ථානයේ දෙව්මැදුරක් ගොඩනගන ලෙසද, පෙරහැරින් එම දෙව්මැදුරට පැමිණෙන ලෙසද ඇය ඉල්ලා සිටියාය. මෙම 'සුන්දර කාන්තාවගේ' ඉල්ලීම එවකට එම ප්‍රදේශය භාරව කටයුතු කළ ගරු පියවරුන්ට දැන්වුව ද ඔවූහූ එය එකහෙළාම එදා ප්‍රතික්ෂේප කළහ. නමුත් අද එම ස්ථානයේ කොයි තරම් විශාල දේවස්ථාන ගොඩනැගී ඇත්දැයි ලූර්දු ගොස් ඇති අය දනිති. එලෙසම වූ ලූර්දු හි පැවැත්වෙන සත්ප්‍රසාදීය පෙරහැර ද, සෑම දිනකම රාත්‍රියේ පැවැත්වෙන ඉටිපන්දම් පෙරහැර ද අති විශේෂ වූ අවස්ථාවන්ය.

මාර්තු 25 සිදු වූ දහසයවන දර්ශනයේ දී මෙම 'සුන්දර කාන්තාව' තමන් නිර්දෝෂ පිළිසිඳීමේ මාතාව (Que soy era Immaculado Conception) ලෙස ප්‍රකාශ කළාය. මරියමාතාවන් තමන් කවුදැයි බර්නදෙත් සහ රැස්ව සිටි සියලු දෙනාට හඳුන්වා දුන් පළමු අවස්ථාව මෙය විය. එබැවින් අදටත් ලුර්දු මාතාව ලෙස අපේ ආදරයට සහ ගරුත්වයට ලක්ව සිටින්නේ "නිර්දෝෂ පිලිසිදගත් මරිය මාතාවන් ය" ලූර්දුවේ සිදුවූ මෙම සිදුවීම් මාලාව කතෝලික සභාව විසින් පිළිගැනීමට මුලින්ම අකමැති වුනාය. නමුත් සිය දහස් ගණන් ජනයා මෙම ස්ථානයට ඇදී එන්නට පටන් ගත් අතර යාච්ඤාව, ජීවිත වෙනස් වීම, රෝග සුව වීම සහ ප්‍රාතිහාර්යයන් බොහෝ සිදු වන්නට පටන් ගැනුණි. එම නිසා 1862 ජනවාරි 18 එම ප්‍රදේශය භාරව සිටි රදගුරු තුමා විසින් මෙම ස්ථානය විශේෂිත වන්දනා ස්ථානයක් ලෙස මුලින්ම පිළිගන්නා ලදී. වර්ෂ 1876 ජූනි 3 දින නමවන පයස් ශුද්ධෝත්තම පියාණන් විසින් ලූර්දුව 'ඉතා විශේෂ වන්දනා ස්ථානයක්' ලෙස කතෝලික සභාව තුළ නිල වශයෙන් පිළිගන්නා ලදී.

මේ වනවිට ලූර්දු මාතාවන්ට කැප වූ දේවස්ථාන හැම රටකම බිහිවී ඇත. ලූර්දු මාතාවන්ගේ මැදිහත් බව තුළ දෙවියන් වහන්සේගේ වරප්‍රසාදය අත්දකින, අත්දුටු ජනතාවක් බිහි වී ඇත. එම නිසා ලූර්දු මාතාවන්ගේ මංගල්‍යය සෑම වසරකම ශු. බර්නදෙත් තුමියට දේවමාතාවන් පළමුවරට දර්ශනය වූ පෙබරවාරි 11 වැනි දින සමරනු ලැබේ.

ලූර්දු මාතාවන් එදා මෙන් අදත් අප කැඳවන්නේ ජීවිත වෙනස් කර ගන්නටය. ජේසුස් ක්‍රිස්තුස් වහන්සේගේ ප්‍රාතිහාර්යයන් අප ජීවිත තුළ සිදුවන්නේ ඒ තුළින් අප ජීවිත පරිවර්ථනයක් ඇතිකර ගැනීම සඳහාය. ලූර්දු මාතාවන්ගේ මැදිහත් බව තුළ දෙවියන් වහන්සේගේ වරප්‍රසාදය අත් දකින අප, දෙවියන් වහන්සේ බලාපොරොත්තු වන එම ජීවිත වෙනස ඇති කරගත් ජනතාවක් ද? "ලූර්දුවේ අප මාතාවනි - අප නිසා යාච්ඤා කළ මැනව"

- ගරු ටෙරන්ස් බෝදියාබදුගේ පියතුමාගේ සටහනක් ඇසුරෙනි.

#OurLadyofLourdes #Mary #MotherMary #Lourdes
#RVASinhala
'RVASinhala' Facebook, Instagram, X, TikTok පිටු like කරන්න, comment කරන්න, share කරන්න, YouTube චැනලය subscribe කරන්න. ස්තූතියි..!