රැකවල් දේවදූතයන්ගේ මංගල්‍යය - ඔක්තෝබර් 02
ජනවන්දනා දිනදසුනේ හමුවන තවත් සුවිශේෂී මංගල්‍යය දිනයක් ලෙස රැකවල් දූතයන් සමරන දිනය දැක්විය හැක. කිතුනුවන් අතර රැකවල් දේව දූතවරුන් පිළිබඳ විශ්වාසය අනාදිමත් කලක පටන් පවතින්නක් වන අතර ශුද්ධ ලියවිල්ල මගින් ඍජුවම පෝෂණය වූ ඉගැන්වීමක් ලෙසද එය හැදින්විය හැක.
රැකවල් දූතයන් ගැන විශ්වාසය සම්බන්ධයෙන් බලපා ඇති ශුද්ධ ලියවිලි පාඨ කීපයක්ම මේ මංගල්‍යය දිනට නියමිත දේව වාක්‍ය ප්‍රකාශන සදහා යොදාගෙන ඇත.
මිසරයේ වහල්කමින් මිදී පොරොන්දු දේශය කරා යන ඉශ්‍රායල් වරුන්ට ආරක්ෂාව සලසන දේව දූතයෙක් පිළිබඳ නික්මයාම පොතේ ඇති සදහන මෙදින පළමු දේව ප්‍රකාශනයේ හමුවේ. එම දූතයා ජනතාවට ආරක්ෂාව සපයන අතර මගපෙන්වීමද කරන බවත් , නියමිත තැනට ඔවුන් රැගෙන යන බවත් පවසන නික්මයාම කතුවරයා ජනතාවගේ පැත්තෙන් ද යමක් අපේක්ෂා කරයි. එනම් ඒ රැකවල් දූතයාට කීකරුව සිටීමටත් , ඔහුට ගෞරවය දැක්වීමටත් ය. (නික්මයාම 23/20-30)
ගීතාවලියේ 91 වන ගීතිකාව හරහා පිළිතුරු ගීය මගින් පිළිබිඹු කරන්නේ දෙවියන් වහන්සේ අපගේ සෑම පියවරකදීම අප රක්නා පිණිස උන්වහන්සේගේ දූතයන්ට අණ දෙන බවයි.
මේ මංගල්‍යය වෙනුවෙන් කියවනු ලබන සුබාරංචි ප්‍රකාශනය තුළ ජේසුස් වහන්සේ අවධාරණය කොට කියාසිටින්නේ උන්වහන්සේ වෙත රදා සිටින බාලයන්ගේ රැකවල් දූතවරු ස්වර්ගීය පියාණන් වහන්සේ අභිමුඛයේ පෙනීසිටින බවයි. වෙනත් අයුරකින් කියතොත් ඒ රැකවල් දූතයෝ ඔවුන්ට භාරකොට ඇති අය වෙනුවෙන් දෙවියන් වහන්සේ ඉදිරියේ පෙනීසිටින බවයි.
සාන්ත සභාව ඇගේ දයාබර දූදරුවන්ට දායාද කර ඇති මාහැඟි උරුමයක් වන යාච්ඤා අතර හමුවන ලුහුඩු යැදුමක් වන්නේ රැකවල් දේව දූතයාට යාච්ඤාවයි. එහිදී අපි අපගේ රැකවල් දේවදූතයාගෙන් ඉල්ලා සිටින්නේ අප රැකබලා ගන්න ලෙසයි. අපට හුරුපුරුදු ඒ යැදුම අතපසු නොකර දෛනිකව උච්චාරණය කරමු.
මාගේ රැකවල් දේව දූතයාණනී ඔබ භාරේ ඉන්නාවූ මට අද දින (හෝ අද රෑ) ඔබගේ පරම දයාබර කමින් ඥාන එලිය දී මා ආරක්ෂාකර නඩත්තු කර ආණ්ඩු කරනවා සොඳේ. ආමෙන්.
#GuardianAngels #Protectus
#RVASinhala
