FABC 2026: ආසියාවේ විශාලතම මුස්ලිම් බහුතරයක් වෙසෙන රටේ පාලම් තනන ජකාර්තා අගරදගුරු පදවිය

FABC 2026: ආසියාවේ විශාලතම මුස්ලිම් බහුතරයක් වෙසෙන රටේ පාලම් තනන ජකාර්තා අගරදගුරු පදවිය

ජකාර්තා, ඉන්දුනීසියාව – ජූලි 20 සිට 26 දක්වා ඉන්දුනීසියාවේ ජකාර්තා නුවරදී පැවැත්වෙන ආසියානු රදගුරු සම්මේලනයේ (FABC) 12 වන මහා සමුළුව සඳහා සූදානම් වන මෙම අවස්ථාවේදී, ජකාර්තා අගරදගුරු පදවිය ආසියාවේ සංවාදය, සහෝදරත්වය සහ පාලම් ගොඩනැඟීමේ සභාවේ මෙහෙවරේ ජීවමාන සාක්ෂියක් ලෙස කැපී පෙනේ.

“සංගමනශීලී පරිවර්තනයට කැඳවීම සහ ආසියාවේ පාලම් හා පාලම් තනන්නන් වීමේ මෙහෙවර” යන තේමාව යටතේ පැවැත්වෙන මෙවර FABC මහා සමුළුවට සත්කාරකත්වය දරන ජකාර්තා අගරදගුරු පදවිය, ලෝකයේ විශාලතම මුස්ලිම් බහුතර රට වන ඉන්දුනීසියාවේ කතෝලික සභාවේ ප්‍රමුඛතම පදවියකි. එය දේශීය සභාවේ ජීවිතයට පමණක් නොව, අන්තර්ආගමික සංවාදය, සමාජ සංවර්ධනය සහ ජාතිය ගොඩනැඟීම සඳහාද වැදගත් දායකත්වයක් ලබා දෙයි.

වසර දෙසියයකට අධික සේවා ගමනක්

ජකාර්තා අගරදගුරු පදවියේ ඉතිහාසය ආරම්භ වන්නේ 1807 මැයි 8 වැනිදා, VII වන පියුස් ශුද්ධෝත්තම පියතුමා විසින් එවකට ලන්දේසි නැගෙනහිර ඉන්දීය කොදෙව්හි කතෝලිකයන් වෙනුවෙන් බටාවියා අපෝස්තලික ප්‍රාන්තය පිහිටුවීමත් සමඟය.

1841 අප්‍රේල් 3 වැනිදා එය අපෝස්තලික විකාරියට් පදවියක් ලෙස උසස් කරන ලද අතර, එම මධ්‍යස්ථානයෙන් ඉන්දුනීසියාව පුරා තවත් අපෝස්තලික පදවි රැසක් බිහි විය.

මෙම වර්ධනයේදී ජේසු නිකාය ඇතුළු විවිධ ආගමික සංඝයන් පාසල්, රෝහල්, ධර්මශාලා සහ සමාජ සේවා ආයතන පිහිටුවමින් සුවිශේෂී දායකත්වයක් ලබා දුන්හ.

ඉන්දුනීසියාව නිදහස ලැබීමෙන් පසුව, 1950 දී බටාවියා අපෝස්තලික විකාරියට් පදවිය ජකාර්තා අපෝස්තලික විකාරියට් පදවිය ලෙස නම් කෙරිණි. ඉන්පසුව 1961 ජනවාරි 3 වැනිදා, XXIII වන ජුවාම් ශුද්ධෝත්තම පියතුමා විසින් එය ජකාර්තා අගරදගුරු පදවිය ලෙස උසස් කළ අතර, බන්දුං සහ බොගෝර් පදවි එහි අනුබද්ධ පදවි ලෙස නම් කරන ලදී.

සංවාදය තුළින් සුබාරංචිය

ජකාර්තා අගරදගුරු පදවියට ඉන්දුනීසියාවේ පළමු ජකාර්තා අගරදගුරු ඇඩ්‍රියානුස් ජයාසෙපුත්‍ර SJ, ලියෝ සුකෝටෝ SJ, කාදිනල් ජුලියස් දර්මාත්මජා SJ සහ වත්මන් අගරදගුරු කාදිනල් ඉග්නේෂියස් සුහාරියෝ හර්ජෝත්මොඩ්ජෝ ඇතුළු කැපී පෙනෙන නායකයන් මඟ පෙන්වා ඇත.

ඔවුන්ගේ නායකත්වය යටතේ, දෙවන වතිකානු කවුන්සිලයේ සහ FABC හි දැක්ම අනුව, ආගම, ජාතිය හෝ සමාජ පසුබිම නොසලකා සියලු ජනතාවට සේවය කිරීම තුළින් සුබාරංචිය ප්‍රකාශ කිරීම මෙම අගරදගුරු පදවියේ ප්‍රධාන මෙහෙවර බවට පත්ව ඇත.

අධ්‍යාපනය, සෞඛ්‍ය සේවාව, මානුෂීය සහන, සමාජ සේවා සහ ප්‍රජා සංවර්ධනය ඔස්සේ මෙම මෙහෙවර අදත් ක්‍රියාත්මක වෙයි.

ජකාර්තා ආසන දෙව්මැදුර සහ ඉස්තික්ලාල් දේවස්ථානය

ජකාර්තා අගරදගුරු පදවියේ අන්තර්ආගමික සාක්ෂිය වඩාත් පැහැදිලිව දක්නට ලැබෙන්නේ ජකාර්තා ආසන දෙව්මැදුර සහ ඉස්තික්ලාල් මුස්ලිම් දේවස්ථානය අතර ඇති සබඳතාව තුළිනි.

අගනුවර හදවතේ එකිනෙකට මුහුණලා පිහිටි මෙම ආගමික ස්ථාන දෙක, අද ලෝකයේ අන්තර්ආගමික සහජීවනයේ සංකේතයන් ලෙස සැලකේ.

ඒවා සම්බන්ධ කරන "මිත්‍රත්ව උමං මාර්ගය" (Terowongan Silaturahmi) ආගමික ප්‍රජාවන් අතර සාමය, අන්‍යෝන්‍ය ගෞරවය සහ සහයෝගීතාව පිළිබඳ කැපවීමේ ප්‍රබල සංකේතයකි.

ශුද්ධෝත්තම පියතුමාගේ සංචාරයෙන් ලෝක අවධානය

2024 සැප්තැම්බර් මාසයේ ෆ්‍රැන්සිස් ශුද්ධෝත්තම පියතුමාගේ ඉන්දුනීසියානු අපෝස්තලික සංචාරයත් සමඟ ජකාර්තා අගරදගුරු පදවිය ජාත්‍යන්තර අවධානයට ලක් විය.

ඉස්තික්ලාල් මුස්ලිම් දේවස්ථානයේදී ශුද්ධෝත්තම පියතුමා මුස්ලිම් ආගමික නායකයන් සමඟ එක්ව 2024 ඉස්තික්ලාල් ඒකාබද්ධ ප්‍රකාශනයට අත්සන් තැබූ අතර, ලෝක සාමය, සහෝදරත්වය සහ අපගේ පොදු නිවස වන පරිසරය රැකගැනීම සඳහා සියලු ආගම්වල ඒකාබද්ධ වගකීම එමඟින් යළි අවධාරණය කෙරිණි.

FABC සමුළුවට සුදුසුම සත්කාරක පදවිය

අද වන විට ජකාර්තා, බෙකාසි සහ ටැන්ගරැන්ග් ප්‍රදේශ පුරා විහිදී ඇති දේවස්ථාන රැසකට, සිය ගණනක් පූජකවරුන්, කන්‍යා සොහොයුරියන්, ආගමික කැපවූවන් සහ දහස් සංඛ්‍යාත ගිහි නායකයන්ගේ සහභාගිත්වයෙන් ජකාර්තා අගරදගුරු පදවිය සේවය කරයි.

සංගමනශීලී ආත්මයෙන් මඟ පෙන්වෙන මෙම පදවිය, සියලු විශ්වාසීන්ගේ ක්‍රියාකාරී සහභාගිත්වය දිරිමත් කරන අතරම දුප්පතුන්, සමාජයේ අන්තයට තල්ලු වූවන් සහ අවශ්‍යතා ඇති ජනතාව වෙත සිය සේවාව තවදුරටත් පුළුල් කරමින් සිටී.

බහුත්වවාදී සමාජයක් තුළ සුබාරංචියට සාක්ෂි දැරූ මෙම දීර්ඝ අත්දැකීම හේතුවෙන්, FABC 12 වන මහා සමුළුව සඳහා ජකාර්තා අගරදගුරු පදවිය ඉතාමත් සුදුසු සත්කාරක පදවියක් බවට පත්ව තිබේ.

ජකාර්තා අගරදගුරු පදවිය සිය ඉතිහාසය පුරාම දරාගෙන ආ මෙහෙවරද එයමයි—සංවාදය, සේවාව සහ සහෝදරත්වය තුළින් පාලම් ගොඩනැඟීම.

ඉන්දුනීසියාවේ විවිධත්වයේ හදවතේ සිට, විවෘතභාවය, සහයෝගීතාව සහ ක්‍රියාවෙන් ප්‍රකාශ වන ප්‍රේමය තුළින් සුබාරංචිය වඩාත් බලවත් ලෙස ප්‍රකාශ කළ හැකි බව ජකාර්තා අගරදගුරු පදවිය අදත් ලෝකයට සාක්ෂි දරයි.

සටහන: මෙම ලිපිය ඉන්දුනීසියානු රදගුරු සම්මේලනයේ ලේඛන හා තොරතුරු අංශයේ නිදහස් දායකයෙකු වන අමඩේයා ප්‍රනාස්තිති විසින් සම්පාදනය කරන ලද ලිපියක් ඇසුරින් සකස් කරන ලදී.

#FABC2026 #FABC #Jakarta #ArchdioceseOfJakarta #Indonesia #SynodalConversion #BridgeBuilders #InterreligiousDialogue #CatholicChurch #ChurchInAsia #RVASinhala #RadioVeritasAsia #CatholicNews