Brother Eagle, Sister Sky කෘතිය ඇසුරින්

ස්වදේශීය ජනතාව වෙනුවෙන් පෙනී සිටිය රතු ඉන්දියානු නායකයා සියැටෙල්ය. ක්‍රි. ව. 1854 දී සියැටෙල් විසින් ඇමරිකානු ජනාධිපතිවරයාට යොමු කරන ලද ලිපිය ලෝක ප්‍රකට පරිසර ප්‍රකාශනයකි. ඩාවින්ගේ පරිණාම වාදය ඉදිරිපත් වීමටත් පෙර සියැටෙල් ජීවීන් අතර පවතින සම්බන්ධතාව මැනවින් අවබෝධ කරගෙන සිටි බව මෙම ලිපියෙන් තහවුරු වේ.

සුවිසල් නුවරක් වූ වොෂින්ටන් හි සුදු ජාතික නායකතුමා අපගේ ඉඩම් මිලදී ගැනීමට අපේක්ෂා කරන බව ප්‍රකාශ කර සිටී.
එහෙත් නිල් අහසත් පොළවේ ඇති උණුසුමත් විකිණීමට හෝ මිලදී ගැනීමට හැකිද..? එය මට නොවැටහේ. මේ අදහස අප හට නම් අරුමයකි. සුළගේ ඇති පවිත්‍ර බව නැවුම් බව ජලයේ ඇති ප්‍රභාවත්‘ බව අප සන්තක නොවේ. එසේ නම් ඔබ ඒවා මිලදී ගන්නේ කෙසේද..?

මේ මහ පොළොවේ සෑම බිම් අඟලක්ම මාගේ ජනතාවට පූජනීයයි. පාරිශුද්ධයි.  ලා හිරු එළියෙන් බබළන දේව දාර ගස්වල සෑම සිහින් පත්‍රයක්ම වැලි තලාවන්ගෙන් වැසුණු සෑම වෙරළ  තීරයක්ම, සෑම එළිමහන් බිමක්ම, අදුරින් බර වූ වනපෙත් වසා පැතිරුණු සෑම මිහිදුම් සලුවක්ම, බිඟු නද පතුරවන සෑම කුඩා ජීවියෙකුම මාගේ ජනතාවගේ සිත තුළත් ඔවුන් ලද අත්දැකීම්වලත් ශුද්ධ වස්තූන්  වේ. ගස් වලින් රෑටා වැටෙන සෑම දිය බිදුවක් තුළට රතු ඉන්දියානුවන් පිළිබද මතක සටහන් ගැබ් වී තිබේ.

අප පොළොවේ කොටසකි. පොළොව අපේ කොටසකි. සුවඳැති මල් අපගේ  සොයුරියෝ වෙති. මුව පොව්වෝ, රාජාලියෝ හා අශ්වයෝත් අපගේ සොහොයුරෝ වෙති. ගිරි මුදුන්වල සිට තණ බිම් වනාන්තර අතරින් ගලා බස්නා දිය දහරා ද අශ්වයාගේ සහ මිනිස් සිරුරේ උණුසුම ද යන මේ හැම දේ එකම පවුලක සාමාජිකයන්ය.

මුව පොව්වෝ, රාජාලියෝ හා අශ්වයෝත් අපගේ සොහොයුරෝ වෙති.

ගිරි මුදුන්වල සිට තණ බිම් වනාන්තර අතරින් ගලා බස්නා දිය දහරා ද අශ්වයාගේ සහ මිනිස් සිරුරේ උණුසුම ද යන මේ හැම දේ එකම පවුලක සාමාජිකයන්ය.

ගංගා ඇළදොළ දිළිසෙමින් ගලා බස්නා ජලය හුදෙක් දිය දහරාවන්ම නොවේ. ඒ අපේ මුතුන් මිත්තන්ගේ රුධිරයයි. අප ඔබට අපගේ ඉඩම් විකිණුවහොත් මේ ඉඩම් අපට පූජනීය වස්තුවක් බව ඔබගේ දරුවන්ටද ඔබ වටහා දිය යුතුයි.

අපගේ භූමියේ පිහිටි ජලාශයන්හි සෑම පිවිතුරු දියමතුපිට පතිත වන සෑම පිළිඹිබුවක්ම මාගේ ජනතාවගේ ජීවිතයේ විවිධ සිද්ධීන් හා මතක සටහන් පවසයි. ජලයෙන් නැගෙන සිහින් හඬ මාගේ පිය පාර්ශවයේ මුතු මිත්තන්ගේ හඬය .

මේ ගංගාවෝ අපගේ සොයුරෝය. ඔවුහු අපගේ පිපාසය සන්සිඳුවාලති. අපගේ දරුවන් පෝෂණය කරති. ගංගාවන් අපගේ මෙන්ම ඔබගේ ද සහෝදරයන් බව සිහිතබාගනු මැනවි. ඒ බව ඔබගේ දරුවන්ට ද කියා දෙනු මැනවි. එහෙයින් මින් මතුවට ඔබ විසින් ඔබගේ සොයුරනට දක්වන කරුණාව ගංගාවලට ද දක්වන්න.

රතු ඉන්දියානුවන් වන අපට මේ අවට පරිසරයේ රැඳුණ වාතය ඉතා අගනා දෙයකි. ඒ මන්ද යත් ගහ කොළ සතුන් මෙන්ම මිනිසුන් වන අප හැම ද ආශ්වාස ප්‍රශ්වාස කරන්නේ මේ වාතයයි. අපගේ මුතුන් මිත්තන් ඉපදුණ විට ආශ්වාස කිරීමට ඉඩදුන් වාතය, ඔවුන් මිය යන මොහොතේ හෙළන අවසන් සුසුම් පොද ද ඊට එක්කර ගනී. එහෙයින් අපගේ ඉඩ කඩම් ඔබට විකිණුවහොත් ඔබ ද එම භූමි ශුද්ධ භූමි ලෙස වෙන්කොට තැබිය යුතුය. එවිට තණ නිල්ලෙහි පිපෙන මල් වලින් සුවඳවත් වූ සුළං රැළි ආඝ්‍රාණය කිරීමට  ඔබට ද ඒවා කරා යා හැකිවන හෙයිනි.

මේ මහ පොළොව මිනිසාට අයිති නැත. එහෙත් මිනිසා මහ පොළොවට අයත්ය. 

අපගේ ඥාතීන්ගේ ජිවිත වලින් මහපොළොව සරුසාර වූ බවත්, මහ පොළොව අපගේ මාතාව බව අප විසින් අපගේ දරුවන්ට කියාදුන් බවත් ඔබලාගේ දරුවන්ට පවසන්න. එවිට ඔවුන් මහපොළොවට ගරු කරනු ඇත. මේ භූමිය කෙලෙසන මිනිසා සිදුකරනුයේ, තමා විසින් තමාම කෙලෙසා ගැනීමයි. ඒ බව අපි හැම දෙනාම දනිමු. එක පවුලක සියලුදෙනා එකම ලෙයින් බැදී සිටින්නා සේ සොබාදහමේ ඇති සියලු දේ එක බැඳීමකින් බැඳි පවතී.

සියලු වල් හරකුන් මිහිමතින් සමුගෙන යන දිනයත්, සියලු වල් අශ්වයෝ හීලෑ කරගන්නා දිනයත් ,මිනිස් ගන්ධයෙන් වන පෙතෙන් සැඟවුන සෑම අස්කොන් පිරීයන දවසත් අපි නොදනිමු. එබැවින් මිනිස් වර්ගයාගේ ඉරණම තවම අපිට අභිරහසකි. එවිට හිමෙන් වැසීගිය කඳු වළලු කොහේ දකින්නට ලැබේද..? රාජාලියන් හිමෙන් වැසීගිය අශ්වයන් මේ හැම වඳවී ගොසින්ය. විනාශ වී ගොසින්ය. දඩයම් කරන සතුන්ගෙන් සමුගැනීම කෙතරම් අප්‍රිය ජනක වේද..!. එය ජීවයේ අවසානයත්, නොමැරී යන්තම් පණ නල රැක ගැනීමේ ආරම්භයත් සනිටුහන් කරනු ඇත.

මිහිකත ඇති ජීව ජාලය මිනිසා විසින් ගෙතුවක් නොවේ. මිනිසා යනු එහි එක් හුයක් පමණි. මේ ජාලයට මිනිසා විසින් යම් හානියක් පමුණවනු ලද ද ඔහු එයින් තමාටම හානි කර ගනී. ඒ බව මතක තබා ගන්න.

අලුත උපන් දරුවෙකු තම මවගේ හද ගැස්මට ආදරය කරන්නේ යම් සේද එසේම අපගේ ජනතාවෝ මේ මහ පොළොවට ආදරය කරති. මේ භූමිය විකුණුව හොත් මේ භූමියට අප මෙන්ම ආදරය කරන්න. අප මේ භූමිය රැකබලා ගත්තාක් මෙන් ඔබ ද මේ භූමිය රැකබලා ගන්න. 

ඔබ මෙය මිලට ගන්නා අවස්ථාවේ මේ භූමිය තිබෙන අයුරු ඔබ සිතෙහි තබා ගන්න. දෙවියන් වහන්සේ සෑම සියලු දෙනාටම එකසේ ප්‍රේම කරන බැවින්, මෙම භූමිය ඔබගේ මුළු ශක්තියෙන් සිතෙන් මෙන්ම හදවතිනුත් ඔබගේ දරුවන් වෙනුවෙන් ආරක්ෂා කර තබන්න.

අපි එක දෙයක් දනිමු. එය නම් අපගේ දෙවියන් වහන්සේ ද ඔබගේ දෙවියන් වහන්සේ ද එකම දෙවියන් බවයි. ඔහුට මේ භූමිය ඉතා වටින්නේය. සුදු මිනිසාට යැයි ඉරණමේ වෙනසක් නැත. කුමක් කීවත් කළත් අපි සැම සොහොයුරෝ වෙමු. 

- Brother Eagle, Sister Sky කෘතිය ඇසුරිණි.

#Seattle #BrotherEagleSisterSky 
#RVASinhala